Muchanan ya caba ta den e ultimo dianan di scol y vakantie grandi ta den porta. Esaki ta trece cune e posibilidad pa mayornan inscribi nan yiu den un vakantie camp. Un opcion cu hopi mayor ta scoge en bes di laga e muchanan keda cas.

Manera ta custumber durante temporada di vakantie grandi tin varios fundacion, organisacion y crèche cu ta organisa camps yen di actividadnan pa muchanan. Esaki di un banda ta algo hopi bon pasobra e muchanan tin algo di haci durante vakantie, pero di otro banda tambe ta hopi importante pa esaki sucede na e manera mas sigur cu por.

Tin algun punto y conseho importante pa mayornan tene cuenta cune na momento di busca un camp, mirando cu aworaki tin hopi variacion cu diferente tipo di actividad, pa haci algun pregunta na e dirigentenan di e campnan cu kisas mayornan no ta para keto na dje.

Un punto cu ta hopi importante ta cu camp mester ofrece actividadnan cu e mucha gusta haci, cosnan cu e mayor sa cu e mucha ta disfruta, pero tambe e seguridad fisico y emocional di un mucha durante e camp ta importante.

Teniendo na cuenta e ley di kinderopvang cu a keda introduci recientemente, ta esencial pa mayornan haci algun pregunta na e dirigente di e camp. Algun pregunta clave ta cuanto lider tin presente durante e actividadnan di e camp, cuanto mucha ta bay tin durante e camp, cuanto mucha cada lider ta responsabel pe, ki medidanan di seguridad ta bay tin durante e actividadnan y si e lidernan ta capacita den prome auxilio pa tuma accion si un momento di emergencia presenta.

Tipo di preguntanan asina kisas hopi biaha e mayornan no ta realisa ta relevante pa puntra, pero e parti di supervision di e muchanan ta hopi importante. Un of dos lider so no por ta responsable pa un grupo grandi di mucha, p’esey mayornan mester tene cuenta cu e preguntanan aki y no perde oportunidad di haya tur informacion necesario prome cu inscribi e mucha den un camp.

Durante actividadnan di camp hopi biaha tin sacamento di potret cual e campnan ta publica ariba rednan social. Mayornan mester tene cuenta cu si nan como mayor no kier of no ta sinti comodo pa nan yiu sali riba rednan social pa puntra e dirigente di e camp si nan ta haci esaki y avisa cu ta prefera pa e mucha no sali den potret.

Den caso cu e mayor no puntra of avisa of si nan duna OK pa e muchanan sali riba potret, ta importante pa no lubida riba kico e mucha mes kier of ta desea. Tin mucha cu no gusta pa nan saca nan potret of graba nan. Den caso cu esaki ta un punto cu mayornan no a discuti cu un dirigente of lider, e mucha mester por sinti comodo y expresa su deseo y opinion den caso cu e no kier sali den niun potret y video.

Tambe tin muchanan cu ta keda cas durante vakantie y hopi biaha, mayoria di e mayornan tin cu traha y no tur ora nan por keda cu e muchanan. P’esey semper mester percura cu tin un persona di confiansa, tanto di e mayor como di e mucha, cu por t’ey na cas.

E parti di laga e mucha cu un persona di confiansa ta uno hopi delicado ya cu e ta relaciona cu e tema di prevencion di abuso di mucha pasobra segun estadisticonan mas recien den 99% di caso di abuso sexual, e abusador ta un persona cu e mucha conoce. E por ta famia, personanan cu e mucha conoce, bisiña, amistadnan di cas, pareha di mama, tata, wela of welo, entre otro. Ta hopi importante pa e mayornan tene esaki na cuenta na momento di dicidi ken ta e persona di confiansa cu lo wak pa e mucha.

Den caso cu algo no ta bon, mayornan mester ta atento na diferente señal cu ta duna indicacion di esaki. Por ehempel, na momento cu e mucha no kier bay mas cerca un persona, no kier keda cu un persona, esey ta un señal clave cu ta indica cu algo no ta bon.

Den casonan asina ta sumamente importante pa e mayornan controla y haci pregunta pakico e mucha no kier bay cerca e persona aki. Specialmente si ta algo cu a pasa di un dia pa otro, si e mucha tabata gusta bay cerca e persona, pero diripiente di un pa otro e no kier bay eynan mas.

Tambe si e mucha su actitud cambia, si e ta bira timido y e no kier papia of si e bira agresivo diripiente, ta un señal cu algo por a sucede.

Un tip hopi importante pa mayornan ta pa nan comunica hopi cu nan yiu. Despues di un dia di actividad na un camp of despues di keda cu un persona na cas, mayornan mester sinta papia cu nan yiu, sin ningun distraccion, puntra nan con nan dia a bay, kico nan a haci, kico nan a gusta of no a gusta, si nan ta sinti bon of si tin algo cu a sucede cu nan kier expresa.