Punda: Ministernan a reuni cu alcalde di ciudad importado mas grandi di cocaina

E siman aki, alcalde di Rotterdam, Ahmed Aboutaleb a bishita Hunta di Minister di Corsou. Aboutaleb tin un carera briyante den arena politico na Hulanda, pero e ta lucha cu e problema di Haf di Rotterdam, cual ta importa anualmente alrededor di 2.2 biyon euro di cocaina. Esaki ta haci Rotterdam un di e ciudadnan mas grandi den narcotrafico na Europa.

Segun un relato di Vigilante di Korsou, dia cu representantenan di Rotterdam a yega e pais pa papia tocante interesnan den Bahia Santa Ana, a mira ta ken ta firma cu nan. Haf di Rotterdam ta un desaster, y ta birando un maneho scondi pa e Hulandesnan, kende ta pretende di no mira nada.

No menos cu 8 miyon container ta drenta haf di Rotterdam tur aña, cual apenas 40mil ta pasa screening, y menos di 6mil ta habri pa duaneronan. Aboutaleb no tin control riba e importacion enorme di cocaina via Rotterdam, y pa es motibo, e mes a admiti cu mester bin den Caribe pa mira kico pa haci. Haf di Rotterdam lo bira doño di 20% di CPA, y pues ta lanta preocupacion cu Bahia Santa Ana lo bira un punto di transporte di cocaina pa Rotterdam.

E aña aki, Erasmus Universiteit a haci un investigacion riba siguridad di e haf, y a conclui cu departamentonan hudicial di e ciudad no tin control suficiente riba siguridad den haf. Ministerio Publico, Duana y Cuerpo di Polis di Rotterdam a auspicia e estudio. Segun e investigadonan di Erasmus, ¼ di cocaina importa den Europa ta drenta via haf di Rotterdam.

Durante entrevista cu empleadonan di e haf, a sali afo cu no tin siguridad riba ken tin autorisacion pa yega na e containernan. Es mas, pa un tiki placa, cualkier persona por habri un container. Segun NOS, haf di Rotterdam tin varios video den cual por mira con organisacion di narcotrafico ta drenta e haf cu arma automatico y saca container sin problema.

Aboutaleb a bisa cu lo biaha na Colombia, Peru y Bolivia pa busca un solucion pa importacion di cocaina via Rotterdam. Segun Vigilante, pa locual ta trata e benta di 20% di nan haf, Corsou no lo impone ningun ‘compliance’ riba Rotterdam prome cu cera acuerdo.