Nos a keda agradablemente sorprendi pa un contribucion di un di e parlamentarionan di e partido grandi den e coalicion demisionario, cu regularmente ta haci uso di e oportunidad cu nos medio ta brinda pa duna opinion como politico y/o partido. Su tema tabata e cosnan cu mester drecha den gobernacion pa economia y empresa por prospera. Nos tabata bao di e impresion cu e asina yama ‘red tape’ a desaparece caba, si nos a scucha su lider politico bon, pero nos ta contento cu e lider ta hera, y cu tin hopi cos di drecha ainda.

Den su relato e ta referi por ehemplo na e trayecto, mejor dicho e caminda di cruz cu un empresario mester cana ora ta trata di busca un permiso pa un restaurant o un bar/cafe, cu ta henter un proceso pa yega na tur e diferente permisonan cu esaki ta encera. No ta trata solamente di e peticion solamente pa e establecimento mes, sino tambe tur e otro instancianan cu mester duna nan bendicion despues di nan inspeccion di e instalacionnan. Pero tambe promer cu por haci esey, lanta un compania y yega na haya un acta pasa na notario, pa despues bay registra na Camara di Comercio y busca un permiso pa por opera, di Departamento di Asunto Economico, ta tuma varios luna. Y tempo ta placa, esey tur empresario sa pero nos mester haci e trabao ainda di convence e funcionario publico cu Aruba su progreso no ta depende solamente di e empeño di e empresario cu ta carga e riesgo financiero, sino tambe di e funcionario cu no ta ni hiba ni trece si e asunto keda pega y e empresario perde placa; fin di luna e ta cobra mescos… Nos ta convenci di e bon intencion di e parlamentario aki, y ta di spera cu despues di su regreso den parlamento e haci un esfuerzo pa logra loke pa hopi aña varios comision entre empresa priva y gobernacion no a logra.

E esfuerzo mas reciente unda a trece hunto diferente representante di sector priva hunto cu funcionario publico riba nivel di responsabilidad, tabata den e elaboracion di e asina yama Masterplan di e gabinete cu a caba di bira demisionario. Atrobe no tabata falta bon intencion di tur banda, pero scuchando di algun di e participantenan kico a discuti, e ta trece memoria back di otro comision cu tabata trata e mesun tema casi un decada pasa. Y e comision di e tempo ey a recore exactamente e mesun caminda, poniendo riba mapa tur e procesonan legal cu un empresa mester cana pa yega na tin tur cos pa e por opera. Lamentablemente den e casi 10 aña nos no a mira nada implementa di loke a propone e tempo aya. Mas grave ta cu, awor cu nos ta den e crisis di pandemia aki, a yega na acuerdo pero nos no ta tende nada mas cu e bon intencionnan, tambe manera vocifera pa e parlamentario solitario, cu sikiera tin e merito di ta consciente di e problemanan aki y ta dispuesto pa yuda resolve nan, segun su ponencia. Di otro banda, y ey e problema ta, nos no ta tende nada di e ehecutivonan den gobernacion cu lo mester haci algo cu tur loke e personanan reuni pa e Masterplan a propone.

E pregunta ta, si den pleno campaña electoral e problemanan di e empresario ta haya atencion. Mientras cu den voto e empresario no ta asina relevante, e ta mas cu relevante ora yega e momento di cana busca placa pa campaña. Di loke nos ta mira te awor e campaña aki no ta bay ta tanto diferente di e otro añanan, en todo caso no pa e dos partidonan grandi, cu ya ta parce den full swing cu material di propaganda. Esunnan cu lo por, o mester, sigui un ruta diferente ta e partidonan chikito y principalmente esunnan recien lanta, cu en berdad ta carece di e fondonan y e structura pa haci nan mensahe yega, pero pesey tin otro metodo. Mester considera tambe cu sector priva a sufri bastante durante e aña cu a pasa, pero nos no tin e impresion cu esey lo stroba e partidonan pa pasa rond pa mira kico tin di haya. Y si acaso nan haya algo pa campaña cune, nan niun no tin cu preocupa pa e famoso control riba nan asuntonan financiero, pasobra inteligentemente a elabora e ley di financiamento di partido politico di tal manera, cu por bay dura varios decada promer cu ley lo por bira efectivo. Esaki pasobra e control riba nan que hacer financiero a ser poni den man di Conseho Electoral, cu no tin absolutamente nada di personal, ni pa traha te of koffi, mucho menos registeraccountant pa controla loke nan ta entrega, eventualmente. Asina nos politiconan den nos cara ta burla di e supervision cu mester a bin tanto aña pasa, y awor cu tin un ley el a bin den e forma di sabotahe di dia cla aki.

Ta di spera cu despues cu nos haya un gobierno nobo, cualkier cu e ta, reforma di e procesonan administrativo no keda na promesa di campaña pa haya placa, pero cu realmente nan ta consciente di su importancia pa nos recuperacion economico.