Te na e momento aki Cas Blanco no a notifica gobierno di Puerto Rico tocante plannan pa kita fondo inicialmente destina na mitiga e consecuencianan di e desaster causa pa horcan Maria na september 2017.
Sin embargo, gobernador Ricardo Rossello ta mantene su intencion di usa e caminda hudicial si presidente Trump, cu of sin declaracion di emergencia, mester dicidi di kita fondo priminti na e Cuerpo di Ingeniero di Ehercito di Estadonan Uni, pa financia parti di un muraya na frontera cu Mexico.
“E sufrimento di esnan cu a perde tur cos no mester ser usa pa financia un promesa politico di Donald Trump. E Puertorriqueño y tur Americano afecta pa e desastrenan ey merece cu ta atende nan necesidadnan,” e director di Administracion di Asunto Federal di Puerto Rico (Prfaa), Carlos Mercader, a declara.
Riba pregunta cu si ya Cas Blanco a bisa algo al respecto, Mercader a bisa cu esey no a sucede, pero “manera gobernador Rossello ya a indica, si esaki ta e proceder di Cas Blanco, nos lo usa tur mecanismo legal cu tin pa sigura y protege e fondonan ey, y cu ta respeta e intencion legislativo.” “Nos no lo permiti cu ta usa nos como bala politico,” Mercader a afirma.
Mientras tanto na Washington tin algun señal di un acuerdo entre e lidernan Democrata y Republicano den Congreso, cu no lo duna Trump tur loke e ta desea pa traha e muraya. E sugerencia menciona ta cu e presidente lo tuma fondo extra cu tabata destina pa otro meta, den un orden ehecutivo, y si ta necesario, declarando un emergencia nacional. E fondonan destina na combati efecto di e desastrenan na e.o. Puerto Rico y California, lo por ta na bista den esaki.
