Academia Americano di Pediatria (AAP) a urgi scolnan pa prepara pa cuminza e aña escolar cu presencia na scol mes. Den algun guia difundi recientemente, e organisacion ta reitera cu, ademas cu e scolnan ta fundamental den e desaroyo academico di e mucha, nan ta esencial tambe den su bienestar social y emocional, ademas di ofrece seguridad, un nutricion confiable y oportunidad di actividad fisico, entre otro beneficio.
“Tin algun beneficio grandi si ta duna les na e scol mes, cu ta ocasiona menos depresion entre e muchanan, mas interaccion social y ta kita nan for di dilanti pantaya (di tv y di weganan digital). E ta un mihor manera di siña,” doctor Ricardo Fontanet ta bisa.
Segun AAP, ausencia for di scol pa hopi tempo por resulta den isolacion di e studiante, ademas di crea dificultad pa e scolnan pa identifica problema den siñamento, como tambe otro situacion, manera abuso fisico o sexual, abuso di sustancia (droga), depresion y pensamento riba suicidio.
“E scolnan ta un lugar critico. Si sigui algun protocol necesario, Fontanet ta bisa. Mantene distancia di al menos seis pia entre studiante, reforza pa uso di mascara, ta algun di e recomendacionnan cu APP ta haci na e scolnan.
Puerto Rico ta sigui den e top regional di paisnan mas afecta pa Covid-19, aunke no di e grado di Republica Dominicana y Haiti, unda e crisis ta parce di ta explotando na e momento aki. Sin embargo, cu mas di ocho mil caso positivo y mas di 150 morto, cu un brote reciente, reapertura di e scolnan ta necesario, pero no sin riesgo.
