(ElNuevoDia) – Puerto Rico ta conta cu un legislacion di dos aña y mey pasa cu ta promove reduccion di contaminacion den aire, pero su implementacion ta, manera hopi, inconsistente, segun profesor di Salud Ambiental di Facultad di Ciencia Medico di Universidad di Puerto Rico (UPR), Pablo Mendez Lazaro a apunta.
E ley di Reduccion, Adaptacion y Flexibilidad na Cambio Climatico (Ley 33 di 2019) ta dirigi un serie di accionnan cu ta hiba e pais na gosa di un ambiente mas limpi, con pa reduci emision di gasnan cu efecto di conservacion. Door di esey, e ta promove e transicion na un modelo sin uso di combustiblenan fossiel pa e produccion di energia electrico, uso di sistemanan di transport mas limpi y reduccion di e deposito di desperdicionan solido.
“Tin cambionan faborabel den e politica publico, pero mester acelera e proceso y pone nan core. Tin cierto boluntad, pero mester duna mas velocidad na e procesonan”, Mendez Lazaro a señala.
E universitario a apunta cu, bao di e Ley 33, a keda estableci cu gobierno no por cumpra vehiculonan cu ta kima combustibel fossiel for di aña pasa. E incumplimento cu e disposicion aki a keda den evidencia entre alcaldenan y miembronan di e Legislatura cu ta sigui adkiri autonan di e tipo aki.
Di e mesun manera, el a señala cu plantanan di energia electrico cu gobierno ta usa den casonan di emergencia no ta cumpli cu e parametronan di calidad di aire.
“Nan ta plantanan obsoleto. Mester actualisa nan of cambia nan”, el a ripiti.
“E mesun hospitalnan y centronan comercial ta kima combustibel den e centro di ciudad (ora cu nan ta usa generadornan electrico). Cada biaha cu tin blackout nos mes ta deteriora e calidad di aire”, el a agrega.
