(ElNuevoDia) – Agencia Federal di Proteccion Ambiental di Merca (EPA), a anuncia diahuebs e asignacion di financiamento di 319 mil dollar cu obhetivo di mantene e calidad di awa na beach y proteha e salud di esnan cu ta baña den e beachnan di Puerto Rico.

E asignacion di e fondonan ta bay permiti e realisacion di programanan di monitoreo acuatico, como tambe iniciativanan pa informa e publico tocante e calidad di awa di e beachnan.

Relaciona na esaki, e financiamento ta sirbi tambe pa avisa e poblacion si e nivelnan di bacteria cu ta wordo detecta durante e monitoreo ta demasiado halto pa garantisa e salud di esnan cu ta baña den e beachnan.

Di acuerdo cu EPA, e factornan cu a influi den e suma di e financiamento pa e isla tabata e duracion di e temporada di bay lama, e cantidad di kilometer di e costanan y e poblacionnan cu ta keda na e costanan.

Den virtud cu e Ley di Evaluacion Ambiental di Beachnan y Salud di e Costanan (BEACH), e agencia federal ta otorga financiamento na solicitantenan estatal y nacionnan indigena of teritorial elegibel pa yuda monitorea e calidad di awa di e beachnan, como tambe den e Lagonan Grandi di Merca.

E estadonan, e nacionnan indigena y e teritorionan elegibel pa ricibi e financiamentonan di e Ley BEACH mester tin awanan recreativo costero of di e Lagonan Grandi cu puntonan di acceso cu ta wordo usa pa e publico.

Tambe ta rekeri nan pa maneha un programa di norma- y standardnan numerico di calidad di awa aproba pa EPA pa awanan costero.

For di 2001 EPA a aloca casi 230 miyon dollar den financiamento di e Ley BEACH pa analisa awa di e beachnan den buskeda di bacterianan cu ta causa enfermedadnan, identifica e fuentenan di problemanan di contaminacion y notifica debidamente e publico,

“E financiamento aki ta yuda mantene e beachnan limpi y e awanan costero pa asina e hendenan por diverti, relaha y disfruta di henter e beyesa cu e costanan di Puerto Rico ta ofrece,” Lisa Garcia, administrador regional di EPA, a indica den un comunicado di prensa.

“E financiamento di EPA ta vital pa e exito di e programanan di monitoreo y notificacion tocante e status di e beachnan,” el a agrega.