E grupo di estudio Center for American Progress (CAP) a urgi ayera na Congreso Mericano pa provee US$ 600 miyon na asistencia alimentario adicional pa Puerto Rico, prome cu nan clausura nan trabou pa 2018.
E autoridadnan di e isla, igual cu e organisacionnan civico, a reclama Congreso pa renoba parcialmente e fondonan di emergencia otorga despues di horcan Maria, cu a yuda pa complementa e fondonan cu e 1,3 miyon beneficiario di e Programa di Asistencia Nutricional (PAN) ta ricibi y cu mester permiti yuda 153.000 persona mas.
Enrique Fernandez Toledo, director di e iniciativa di Politica Publico Economico y Alivio pa Puerto Rico di CAP, a recorda cu 97% di e participantenan di PAN tin un entrada bou di e linea di pobresa, mientras otronan cu ta bou di e linea di pobresa tin acceso limita o ningun acceso, pa falta di suficiente financiamento di e programa. Congreso a asigna na october 2017 US$1.270 miyon na fondo di emergencia di e Programa di Asistencia Nutricional Suplementario (SNAP). Pero, gobierno federal ta calcula cu e fondonan lo caba na fin di 2019.
“Puerto Rico ta sigui sufri di desempleo y insiguridad alimentario despues di e horcannan Irma y Maria,” Fernandez Toledo a indica.
Tambe el a urgi e publico pa nan sigui pone presion riba e politiconan yamando na nan oficinanan na Congreso, pidiendo pa e proximo Congreso atende e problemanan cu Puerto Rico ta enfrenta cu acceso na fondo pa cubri e necesidadnan di asistencia alimentario.
