Autoridadnan di e isla ta sigura cu e Jones Act cu ta regula e transporte di mercancia pa e isla ta impactando e esfuersonan pa haci e auxilio mas efectivo, cu nan mester urgentemente despues di e paso di horcan Maria.

E posibilidad cu Puerto Rico lo ta sin electricidad durante varios luna lo impacta directamente e  capacidad di autoridadnan pa garantisa e servicionan minimo di alimentacion, salud, transporte y educacion di e poblacion.

E desastre provoca pa horcan Maria na e isla ta di proporcion nunca bisto antes, por lo menos den e ultimo siglo. Den e contexto ey ta vital cu e ayudo yega rapido na Puerto Rico, di forma diligente y sin complicacion, tanto legal como administrativo.

Sin embargo, un creciente cantidad di politico na Washington ta exigiendo na Departamento di Siguridad Nacional pa pone algun restriccion legal cu ta impediendo cu barconan por atraca na puertonan di e isla cu mercancia cu ta considera urgente. E principal obstaculo legal ta parce di ta e asina yama Jones Act.

Kico ta e  Jones Act

E Jones Act ta un ley cu, entre otro asunto, ta contene un regulacion comercial cu ta señala cu cualkier transporte di persona o mercancia entre dos puerto di Estadonan Uni mester ta cu un barco di bandera Mericano, o di lo contrario (si e ta di bandera stranhero) e lo ser sanciona cu impuesto y tarifa. El a wordo aproba poco despues di fin di prome guera mundial cu obhetivo di yuda e industria maritimo nacional pa recupera despues di e conflicto mundial. E barconan aki ademas mester ta di fabricacion Mericano, cu tripulacion Mericano y di doño Mericano.

Kico a pasa na Texas y Florida despues di Harvey y Irma

Despues cu e horcannan Harvey y Irma a pasa den Texas, Louisiana y Florida, e Departamento di Siguridad Nacional a lanta e restriccionnan estableci den e ley, pa evita cu lo a surgi un inminente paro den suministro di gasolin, cu den menos di cinco dia a keda agota den e stacionnan di servicio pa e demanda exagera cu tabatin den e dianan prome cu e horcannan a yega, ora cu cien mil di persona a yena tanki di nan vehiculo, y otro recipiente pa warda combustibel extra pa conta cu ne, pa e posibilidad di mester evacua nan hogar o uza planta electrico portatil debi na e falta di energia electrico. E falta di gasolin den e stacionnan a keda resolvi rapidamente den poco dia pasobra, entre otro, a permiti e tankernan stranhero pa atraca na puertonan di Texas y Florida.

Kico ta pasando na Puerto Rico

E Departamento di Siguridad Nacional a nenga Puerto Rico un excepcion parcial di e ley, tal manera a haci pa Florida, Texas y Louisiana. E argumentacion ta cu e problema cu e envio di suministro pa  isla no tin di haci cu e cantidad di barco, sino cu e capacidad cu puertonan di e isla tin, mirando e aumento di trafico di barco.

E representante di Puerto Rico na Congreso na Washington, Nydia Velázquez, hunto cu otro shete congresista a pidi diamars cu a pasa pa lanta e restriccion cu e  Jones Act ta establece. E portavoz di e Oficina di Aduana y Proteccion di Frontera, Gregory Moore, a responde cu e  analisis cu nan a haci a indica cu tabatin suficiente capacidad pa barco di bandera Mericano transporta e mercancia cu Puerto Rico mester.

“E limitacion ta bay ta e capacidad di e puerto pa descarga mercancia, como tambe e trafico, no e disponibilidad di barco,” Moore a declara.

E autoridadnan di e isla a indica cu e situacion di Puerto Rico ta diferente, cu e ayudo humanitario lo yega den barco chikito di bandera Mericano ampliamente disponibel. Den e caso di e costa oriental di Florida, tabatin necesidad di barco tanker di calado grandi capaz di transporta miyones di galon di combustibel.

E ley aki di casi un siglo di antiguedad a causa prijsnan infla na e isla. Segun un reportahe di The New York Times un informe elabora pa Universidad di Puerto Rico a haya cu e Jones Act a causa 17.000 miyon dollar di perdida pa economia di e isla entre 1990 y 2010. Incluso e informe ta bay mas leu y ta afirma cu si e ley no tabata existi, Puerto Rico lo no tin e debe astronomico cu actualmente tin e pais al borde di collapse economico.

Un di e argumentonan en contra di e Jones Act ta cu e otro teritorionan Mericano manera US Virgin Islands no ta cay bao di mesun regla. “Ta inaceptabel forsa pueblo di Puerto Rico paga por lo menos dos biaha mas pa alimento, awa emboteya, suministro y infrastructura, debi na  rekerimentonan di e Jones Act,”  senador John McCain ta skirbi, cu ta un di e politiconan Mericano cu a tuma accion contra e aplicacion di e ley riba Puerto Rico.