Lidernan di Senado Mericano lo propone garantisa den e proximo resolucion di presupuesto, un asignacion di emergencia pa Puerto Rico cu por ta alrededor di $16.000 miyon, incluyendo como $4.800 miyon na fondo di Medicaid y $2.000 miyon pa reconstrui e red electrico.
E informacion, cu algun variante, a bin di fuente republicano den Senado y di gobierno di Ricardo Rosselló. Nan ta coincidi den indica cu congreso lo ofrece e isla un asignacion cu ta permiti pone proyecto di reconstruccion cana pa e isla, despues di e catastrofe causa pa horcan Maria.
E fondonan di Medicaid lo ser otorga pa e proximo dos aña, como un asignacion special di emergencia den cual lo duna e isla pleno acceso temporal na e programa ey, manera a haci na Louisiana despues di horcan Katrina.
E asignacion di emergencia di Medicaid lo ta alcansa $4.900 miyon pa dos aña y lo inclui US Virgin Islands, cu por obtene cerca di 3% di e fondonan aki.
Hunto cu e fondonan di Medicaid ta asigna $11.000 miyon di forma directo na e isla pa e programa di desaroyo comunitario di e departamento di vivienda federal, conoci como CDBG. Di e fondo aki lo sali e $2.000 miyon pa e red electrico.
E acuerdo, segun e fuente republicano, ta mantene e restriccionnan unda e Hunta di Supervision Fiscal di congreso ta encarga cu financia publico di Puerto Rico y lo certifica e plannan di recuperacion y e asignacionnan na e Isla.
Poco prome, e senador republicano Marco Rubio (Florida), a anuncia bon noticia pa Puerto Rico y Florida. “Excelente progreso awe tocante e asistencia pa desastre pa Florida y Puerto Rico. Confia cu e liderato democrata den Senado lo firma tambe,” Rubio a indica den un tweet.
Algun dia pasa, e senador democrata Bill Nelson (Florida) a reclama cu mester inclui den cualkier resolucion, un asignacion nobo di Medicaid pa Puerto Rico y fondo pa financia e reconstruccion di e red electrico.
