Diadomingo desde oranan tempran poblacion tabata wardando pa e prome boletin informativo. Puertorriqueñonan cu a vota diadomingo den un plebiscito, marca pa un indice halto di abstencion a opina na fabor di agrega Puerto Rico na Merca como estado, un resultado cu gobernador Rosselló a priminti di bay  defende den foro internacional. E anexion a gana cu  457.959 voto, como 97,26% di voto deposita.

E votacion riba futuro status politico na Puerto Rico a clausura cu e centronan  di votacion cerando nan porta riba diadomingo cerca di 3 ora di atardi.

Como 2.8 miyon di persona tabata autorisa  pa scoge: Laga Puerto Rico bira un estado pleno di Merca, of Scoge pa asociacion / independencia of mantene e situacion actual di estado liber asocia.

Mas di 4200 colegio electoral a keda habilita den un jornada cu a desaroya sin mayor problema.  E proceso odi plebiscito ta tuma lugar den un crisis economico cu a hiba un 46% di poblacion na pobreza y tin Puerto Rico cu un debe superior na 70.000 miyon dollar.

Independentistanan tabata wardando pa mustra cu abstencion nan rechaso pa e opcion di Puerto Rico pa bira un estado di Merca. Di otro banda e consulta no ta vinculante.