Un chat riba e medio Telegram den cual tabata participa gobernador Ricardo Rosello, a bira centro di un debate ora e contenido a yega na man di prensa. Algun legislador, di e mayoria gubernamental, a mustra nan rabia pa e comentarionan sexista y insultonan lansa den e chat pa e gobernador y su colaboradonan riba Telegram.
Otronan a expresa apoyo na e mandatario y a acepta e disculpa publico cu el a duna durante un conferencia di prensa ofreci algun ora despues di su yegada na Puerto Rico, procedente di Spaña.
Den e chat a participa su ex Director di Campaña pa gobernacion, Elias Sanchez, ex Secretario di Asunto Publico Ramon Rosario, asesornan di comunicacion Rafael Cerame y Carlos Bermudez, entro otro. Nan a expresa insulto na ex consehal di New York, Melissa Mark-Viverito, Director Ehecutivo di e Hunta di Supervision Fiscal, Natalie Jaresko, entre otro, y a emiti orden pa ataca publicamente e comentario di adversarionan di gobierno.
Senador Migdalia Padilla a opina cu tur esunnan cu tabata den e chat mester sali di gobierno o no mester tin contacto mas cu autoridadnan di e estado. Ora a puntr’e si esey ta inclui e gobernador tambe el a contesta cu “esey ta depende di e mes.”
Senador Zoe Laboy a mustra su incomodidad cu e situacion y e pretension di Rossello cu e no ta papia mas di e asunto. “Mi ta bay hacie aki tur e preguntanan cu ayera e no a contesta,” segun Laboy.
E scandal di e chat ta surgi na momento cu ta trata un caso grandi di corupcion den Corte, unda entre otro e ex Secretario (minister) di Educacion, Julia Keleher y ex-Hefe di Administracion di Seguro, Angela Avila Marrero, ta envolvi. Ta trata di desfalco di mas di 15 miyon dollar di fondonan publico.
