Gobernador di Puerto Rico, Ricardo Rossello, lo a anuncia su renuncia ayera diaranson, di acuerdo cu un fuente cu conoce e situacion di cerca. Ta anticipa cu su puesto lo ser ocupa pa e Secretario (Minister) di Husticia di Puerto Rico, Wanda Vazquez. Esaki ta sosode solamente un dia despues cu su Hefe di Personal a presenta su renuncia, efectivo desde 31 di juli.
Ricardo Llerandi Cruz a skirbi den su carta di renuncia: “E ultimo dianan tabata extremadamente dificil pa nos tur. Na e momento historico aki, mi mester tuma na consideracion bienestar di mi famia. E menasanan cu nos a ricibi bo por tolera como individuo, pero nunca lo mi permiti esaki afecta mi hogar.”
E protestanan na e isla Mericano ta bayendo pa un siman y e manifestantenan di edad halto a bisa cu e manifestacionnan di dialuna pasa tabata esunnan di mas grandi cu nan a yega di mira na e isla.
Durante diaranson no tabatin un claridad unda e Gobernador tabata. Hasta tabatin speculacion cu e no tabata na Puerto Rico mas. Oficina di Rosselló a emiti un comunicado diamars den cual e ta bisa cu e tabata atento y den silencio durante e protestanan y cu e lo considera haci loke ta miho pa e pueblo.
“Ora un banda ta papia cu legitimidad, e otro ta responsabel pa scucha cu atencion,” el a bisa. “Pueblo ta papiando y mi tin cu scucha. Pa e momento aki, e expresionnan futuro cu mi lo emiti lo ta dirigi na e accionnan cu nos ta bay tuma como parti di e trabao di gobierno, tal manera a priminti manera pueblo a spera.”
