Puerto Rico: Presidente di UPR ta firma acuerdo pa pone fin na welga di empleado

(ElNuevoDia) – Presidente di Universidad di Puerto Rico (UPR), Luis A. Ferrao Delgado, a anuncia diaranson cu el a firma e stipulacion cu acuerdonan economico alcansa cu Sindicato de Trabajadores y a manda esaki pa Junta de Gobierno di e universidad, loke por pone fin na e welga inicia pa e union cu ta agrupa miles di empleadonan no docente.

Unabes e Junta de Gobierno a aproba esaki, e stipulacion ta pasa pa aprobacion di e Junta de Supervision Fiscal (JSF), e lider universitario a indica.

“Semper defendiendo e miho interesnan di henter e comunidad universitario y cu esfuerso pa mantene nos universidad semper habri, y continua cu un clima di stabilidad institucional y di paz laboral, mi a firma e stipulacion cu e Comite di Negociacion a respalda.” Ferrao Delgado a expresa mediante un comunicado di prensa.

Empleadonan cu ta forma parti di e Sindicato de Trabjadores di UPR a lanta, diaranson mainta, na e portanan di, por lo menos, shete edificio den e inicio di un welga pa reclama e firma di e acuerdonan cu lo beneficia e trahadonan economicamente.

“E expectativa ta cu e cos a finalisa. Si e Junta de Gobierno ta ratifica esaki awe, diaranson, e controversia a wordo resolvi y diahuebs no los regresa na nos labornan,” e presidente di e Sindicato de Trabjadores, David Muñoz Hernandez, a sostene den un entrevista telefonico na momento cu e puntrele tocante e anuncio di Ferrao Delgado.

“Nos a logra e proposito di e welga. Nos no a haci nada diferente di loke tabata haciele di e manera corecto desde comienso,” e lider sindical a agrega, den referencia na e reclamo di e empleadonan cu e respaldo di Ferrao Delgado y e Junta de Gobierno lo keda determina prome cu manda e documento na JSF.

E presidente di e Sindicato de Trabajadores a indica cu nan ta bay ta den welga te ora cu e presidente di UPR firma un stipulacion acorda den un proceso di negociacion cu lo otorga, entre otro acuerdonan, un aumento salarial na e empleadonan cu nan ta representa.

E stipulacion ta contene un aumento di salario base di e empleadonan representa pa e Sindicato na 13 dollar pa ora, e ta otorga e pago di un bonus di 500 dollar, ta sigura un aumento di salario di no menos cu 300 dollar of 6% riba e salario vigente y reinstala e derecho pa tin nan propio plan medico.

“Nos ta compronde cu nan ta husto pa e trahadonan di e Sindicato, cu tin añas sin un aumento di salario. Mi ta spera cu e miembronan di e Sindicato desisti di e welga aki y cu dialogo por continua pa e bon di e institucion,” e presidente di UPR a manifesta.

“Di aworaki nos ta compromete nos mes pa realisa tur e gestionnan necesario dilanti JSF pa logra su aprobacion pronto tal cual el a wordo someti,” Ferrao Delgado a conclui.