Gobernador di Puerto Rico, Ricardo Rosselló, a declara estado di emergencia pa motibo di horcan Irma cu ta acercando riba Oceano Atlantico y tin probabilidad grandi di pasa riba e isla Borincano. Segun National Hurricane Center (NHC) e horcan ta siguiendo su trayectoria sin mayor cambio, cu ta haci e probabilidad mas grandi ainda.
Dialuna 14:00 ora e wowo di e horacan, na nivel di categoria 3 mientras tanto, tabata na 16.7 grado norte di latitud, y na 53.8 grado di longitud west. E sistema ta move den direccion west-zuid-west na 14 miya pa ora (22.4 km/ora).
NHC riba dialuna mainta a emiti un vigilancia di horcan pa Puerto Rico y e islanan cerca manera Vieques y Culebra, como tambe pa British y US Virgin Islands.
Tambe tin un aviso di horcan pa algun isla di e Antiyanan Menor, manera Antigua, Barbuda, Anguilla, Montserrat, St. Kitts, Nevis, Saba, St. Eustatius, St. Maarten, St. Martin y St. Barthelemy.
Mientras tanto, Guadaloupe a bay bao di vigilancia di horcan, y gobierno di Barbados a emiti un vigilancia di tormenta tropical pa isla Dominica.
Ta anticipa cu e fenomeno atmosferico lo continua intensificando y ora e yega e punto mas cercano na Puerto Rico, cu por ta entre nochi di diarazon y marduga di diahuebs, por ta di categoria 4 riba escala Saffir-Simpson. Un horcan den e categoria aki tin biento di 131 pa 155 miya pa ora (210 pa 248 km/ora).
Kico ta e diferencia entre vigilancia y aviso di tormenta o horcan?
E vigilancia ta emiti pa e Centro Nacional di Horcan 48 ora prome cu e inicio previsto di e bientonan cu forsa di tormenta o horcan. Un aviso ta significa cu efectonan di e ciclon por yega dentro di 24 pa 36 ora.
