Puerto Rico: Pensionadonan ta exigi gobernador pa firma medida pa aumenta nan pensioen

(ElNuevoDia) – Decenas di pensionadonan di e Gobierno di Puerto Rico a yega diadomingo te na e caya di La Fortaleza na e Viejo San Juan pa reclama e firma di e gobernador Pedro Pierluisi pa e Proyecto di e Camara (PC) 2038, un medida legislativo cu, si e converti den ley, ta concede na e pensionadonan un aumento di hasta 300 dollar pa luna.

“E mensahe cu nos ta hibando na e gobernador ta cu nos tin ya 17 aña sin ningun tipo di aumento y si hopi recorte,” Pedro Pastrana Ortiz, di e Capitulo de Jubilados di e Federacion de Maestros de Puerto Rico (FMPR), a bisa.

E Proyecto di e Camara 2038 ta busca aumenta cu un 10%, den e prome fase, e pensioen di e pensionadonan di e gobierno central, cu excepcion di e Autoridad di Energia Electrica (AEE) y e Universidad di Puerto Rico (UPR). E medida a wordo aproba den e Legislatura y a wordo firma pa e presidentenan di e Camara y e Senado dia 9 di juli.

“Nos a pidi un reunion na e gobernador ora cu e proyecto a wordo aproba den e Camara y Senado. Te aworaki, e reunion no a yega ainda,” Pastrana a señala.

Tocante e asunto aki, e secretaria di prensa di e La Fortaleza, Sheila Anglero, a bisa na e El Nuevo Dia, cu “e gobernador semper a respeta e derecho cu tur hende tin na manifesta.”

“E proyecto di ley ainda no ta riba su lessenaar pa su evaluacion y ta su custumber no emiti criterio tocante un medida sin tin un analisis di dje, incluyendo su impacto fiscal,” e vocero a indica den declaracionnan por escrito.

Pastrana a indica cu presuntamente, den La Fortaleza y e Junta de Supervision Fiscal ta existi reparcionnan cu e proyecto pa supuesto choke cu e Plan di Ahuste, algo cu el a cualifica manera incorecto.

“Lague demostra su bon ofishi y cu e tin un compromiso real cu e pensionadonan, cu prome cu nan sali di La Fortaleza e haci husticia pa e 160 mil pensionadonan pa evita cu nos ta cay den indigencia,” Pastrana a sostene na momento cu el a manda un mensahe pa e gobernador.

Segun e medida, despues di e prome aumento, nan ta bay otorga aumentonan anual cu ta ekivalente na loke ta e informe di ahuste pa costo di bida ta dispone, cual ta wordo emiti anualmente pa e Administracion di e Seguro Social.

E fuente di financiamento pa otorga e aumento aki lo bin di e ingresonan no comprometi di e Impuesto sobre Ventas y Uso (IVU) den e pago di e debe di e Corporacion del Fondo de Interes Apremiante (Cofina).