(ElNuevoDia) – Despues di alcansa e punto mas abou di mortonan pa motibo di COVID-19 den luna di mei ultimo, fin di juni y e prome mita di juli ta apunta na un aumento den e mortonan pa e enfermedad aki, segun e datonan cu e Departamento di Salud ta recopila y publica riba nan website.

Memey di e ola aki, sinembargo, e caso- y hospitalisacionnan asocia a cuminsa disminui, door di cual ta spera cu den e proximo simannan mesun cos ta pasa cu e mortonan, dokter Melissa Marzan, oficial principal di Epidemiologia di e Departamento di Salud a resalta.

“Entre 18 pa 26 di juni, tabata e momento unda mas accion nos a wak na momento di e ola aki. Nos a yega na alcansa 2.500 caso den promedio pa dia. Aworaki e promedio pa dia ta mil (1.000) caso,” Marzan a precisa. “Nan ta keda hopi; e ta convirti’e den e enfermedad respiratorio di mas incidente,” el a agrega recordando cu nan ta sperando un aumento di contagio den e proximo lunanan.

Pa loke ta trata e mortonan, a alcansa e punto mas abou durante e aña aki dia 24 di mei, cu un media mobiel (promedio di shete dia) di 0.3 y ningun morto reporta e dia ey. Sinembargo, den un poco mas cu un luna, e media mobil a yega 6.4, dia 30 di juni, cu 10 morto pa COVID-19 solamente e dia ey. Segun e datonan di e Departamento di Salud, cu ta actualisa e informacion na medida cu nan ta ricibi e certificacionnan di morto, entre 1 y 14 di juli, a reporta 52 morto asocia cu e enfermedad.

Di e total di fayecidonan, 33 ta personanan adulto mayor, di 80 aña of mas, otro nuebe ta coresponde na e grupo di 70 pa 79 aña, shete na e grupo di 60 pa 69 aña, dos na e grupo di 50 pa 59 aña y uno cu ta pertenece na e grupo di 40 pa 49 aña.

Te cu 14 di juli, e cifra di mortalidad (morto pa cada 100 mil habitante) tabata na 1.6, un aumento den comparacion cu e tasa di 0.09 di dia 31 di mei.

“E ta keda cla, den e epidemiologia di COVID-19 na Puerto Rico, cu nos adultonan mayor ta hiba e pio parti di e situacion aki y lamentablemente, di e datonan preliminar cu nos a evalua, di e mortonan den luna di mei te cu aworaki, e 20% di e mortonan ey tabata e uniconan cu tabatin e dosis actualisa di e vacuna cu a wordo recomenda den september,” Marzan a subraya, reiterando cu e vacuna ta efectivo pa preveni y disminui e riesgo di enfermedad severo y morto.