Tin un confusion na Puerto Rico riba kico exactamente mester sosode awe tardi 5:01 pm ora Gobernador Rossello oficialmente ta entrega su puesto. Oficialmente, segun Constitucion, e Ministro di Relacion Exterior (Secretario di Estado) ta su sucesor pa termina e periodo di gobernacion, sin embargo e persona aki tambe a renuncia.
E siguiente den linea ta e Secretario di Husticia, Wanda Vazquez cu a declara enfaticamente cu e no kier ocupa e puesto. Mientras tanto, Rossello a apunta un siguiente candidato pa Secretario di Estado, Pedro Pierluisi, cu ta programa pa ta den Senado dialuna venidero pa defende su nombramento como Secretario di Estado. Awor ta surgi e debate ta ken lo ta e Gobernador desde awe 2 di augustus, te ora cu tin un Secretario di Estado formalmente den funcion.
Un problema adicional por surgi si resulta den Senado cu Pierluisi no haya e votonan necesario pa keda nombra. Algun hurista specialisa den constitucion, Jose Julian Alvarez y Carlos E. Ramos a conta El Nuevo Día cu e Gobernador na e momento ey lo ta e Secretario di Husticia Wanda Vazquez, ya cu no tin Secretario di Estado confirma pa Parlamento, manera Constitucion di Puerto Rico y Ley 7 di 1952 cu ta stipula e sucesion di e puesto di Gobernador.
Pierluisi a keda huramenta antayera como Secretario di Estado designa, pero su nombramento -e unico den e gabinete ehecutivo – mester haya confirmacion di e tanto Camara di Representante como di Senado, pero no tin e votonan necesario. Asina e confusion ta continua entre e Senadornan mes, tocante ken ta reemplasa Gobernador mientras tanto.
