E meta di gobernador Ricardo Rosselló pa logra cu e Autoridad di Energia Electrico (AEE) alcansa generacion di por lo menos 95% di energia necesario pa dia 15 di december, a pasa pa segundo plan.
E ehecutivo a afirma, den entrevista radial cu WKAQ 580 – Univision Radio, cu pa e fecha ey ‘lo haci lo maximo cu ta fisicamente posibel’.
A keda solamente ocho dia ayera pa alcansa e meta cu e ehecutivo a pone despues cu e horcan Maria a pasa, lagando 100% di e pais den scuridad. No obstante, AEE ainda no a logra aumenta te na 80% di necesidad di energia, cu tabata e meta pa dia 30 di november.
E pagina cibernetica status.pr ta specifica cu ayera a alcansa un generacion di 68.4%.
“Ami lo gusta si, no dia 15 sino mañan mes henter Puerto Rico por tin coriente. Loke ta mi papel ta sigura cu tur hende tin sentido di urgencia, cu Puerto Rico tin e capacidad pa por logra cu tin energia lo antes posible y paralelo na esaki diseña un strategia pa modernisa e sistema electrico,” sr. Rosselló a afirma.
De paso, el a insisti cu el a establece e metanan pa, precisamente “establece un sentido di urgencia.”
“Nos a traha tur dia cu AEE y e Cuerpo di Ingeniero cu e distinto contratistanan pa tin un comando unifica,” el a agrega. E gobernador a comenta cu den e luganan cu ta mas dificil pa realisa energia lo pone algun micro-red pa por tin energia prome cu conecta e zonanan ey riba e red general. Ta e luganan cu por tarda varios luna pa keda conecta.”
