(ElNuevoDia) – E presidente di e Union General di Trahadonan (UGT), Gerson Guzman Lopez, a anuncia cu e trahadonan di e Centro Cardiovascular di Puerto Rico y Caribe ta bay cuminsa cu nan paro indefini desde diadomingo 21 di mei pa 11:59 di anochi.
E paro aki, cu a wordo ratifica na final di luna di april pa e mayoria di e miembronan di e union na e centro, ta wordo realisa como un ultimo medida pa e administracion hospitalario mehora e condicionnan laboral di su trahadonan.
“E trahadonan di e Centro Cardiovascular di Puerto Rico y di Caribe no a ricibi un aumento di salario pa mas di 12 aña. Nos a wak con e inflacion y e costo di bida a aumenta aña tras di aña, pero e condicionnan di e trahadonan a keda mescos,” Guzman Lopez a expresa durante un conferencia di prensa celebra den cercania di e centro, cu ta atende tanto pashentnan di Puerto Rico como di e resto di e teritorio Caribense.
E reclamonan di e 340 empleado cu ta parti di e union cu ta uni na e paro indefini ta inclui e contratacion di mas personal, mehoracion di salario y respet pa e proceso di negociacion colectivo mediante e union.
“E ta poco loke nos a delanta den contratacion di personal nobo. Pa accentua e situacion, e personal cu nos tin den cada un di e facilidadnan aki ta extremadamente cansa pasobra nos tur sa cu ainda nos ta saliendo di e pandemia di COVID-19 na Puerto Rico,” e presidente di UGT a agrega.
Guzman a bisa tambe cu e aumento di salario ta materia di negociacion, pero cu nan no ta dispuesto pa acepta menos di loke a ofrece otro empleadonan gubernamental.
A pesar cu a vota na fabor di e paro desde final di april, door cu ta trata di un institucion hospitalario, pa ley nan no por a cuminsa di biaha, ya cu nan mester haci e ahustenan necesario pa e funcionamento di e hospital.
