Gobernador di Puerto Rico, Wanda Vazquez, a señala cu a aproba asistencia pa desempleo pa e personanan afecta pa e teremotonan.
Gobierno di Puerto Rico a afirma cu casi 63.000 persona a ser atendi den e refugionan, unda nan ta despues di varios sismo pisa registra na e pais desde fin di december.
“Den e reporte di asistencia ta bisa cu a atende mas di 62.822 persona den e refugionan, 252 adulto mayor relocaliza, 13.852 solicitud di FEMA (Agencia Federal pa Maneho di Emergencia) ricibi, 7.081 propiedad inspecciona pa ingeniero y 561 scol inspecciona,” gobernacion a duna di conoce.
Te cu diamars pasa FEMA a otorga na 1.086 famia afecta pa e teremoto mas di dos miyon dollar pa 717 famia na asistencia di emergencia, 350 famia a haya fondo pa reparacion y a paga na 19 famia 35.500 dollar pa reemplaso di nan hogar,” segun Vazquez.
Tambe gobierno di Estadonan Uni a declara estado di emergencia mayor pa Puerto Rico, loke ta implica distribui fondo di ayudo federal pa e municipionan di Guanica, Guayanilla, Peñuelas, Ponce, Utuado y Yauco, den sur di e isla.
Debido na e problemanan causa pa e teremotonan e Conseho Mundial di Biahe y Turismo (WTTC, na Ingles) a dicidi di traslada su evento internacional, cu tabata programa na Puerto Rico, pa Cancun, Mexico.
“Aunke e isla tabata cla pa ricibi nos cu brasa habri na april, a pesar di e reciente actividad sismico den e region sur, reasigna recurso pa continua cu e gran impulso ta lo corecto pa impulsa ainda mas e turismo. Nos ta spera di organisa un evento na Puerto Rico na fin di e aña aki,” presidente y director ehecutivo di WTTC, Gloria Guevara, a declara.
