Puerto Rico a mira su mes obliga di dal un paso atras cu su reapertura di economia, pa motibo di un aumento repentino den e cantidad di caso di Covid-19.
Gobernador Wanda Vazquez Garced a insisti cu e subida aki den e cantidad di contagio ta pasobra un sector di e poblacion a “baha nan guardia” y no a comprende e flexibilisacion di e medidanan di contencion di juni. Tambe tabatin critica publico riba e gobernador unda ta señala cu el a para e medidanan di contencion prematuramente.
“Gobierno a tuma algun medida. Nos a habri un di cuatro fase pa tur ciudadano por a disfruta y cu por tabatin actividad economico, pero tin persona cu tin sonsciencia social y otronan cu no tabata consciente, y asina nos a haya e aumento aki. Awor mi ta haci un yamado na pueblo,” e gobernador a bisa, cu dialuna pasa a anuncia cu el a cancela tur su actividadnan di campaña politico relaciona cu eleccion pa gobernador unda e alcalde di San Juan, Carmen Yulin Cruz, lo ta su rival mas importante. Parti di e bataya politico ta trata e actual maneho di ambos di e crisis di coronavirus.
E gobernador a anuncia den un mensahe transmiti pa television gubernamental cu e tabata reinstalando cierto medidanan pa preveni transmision di e virus. E instruccionnan nobo ta encera e continuacion di toque de queda, restriccion di uso di beach, un prohibicion pa benta di bebida desde 7:00 p.m, y e ciere di bar, discoteca, cine, sala di concierto, salon di wega, teatro, casino, parque di atraccion, wafnan di yate, trafico maritimo y gym.
