(ElNuevoDia) – E representante di e Partido Independentista Puertoriqueño (PIP), Denis Marquez Lebron, a presenta un proyecto di ley pa crea un beca di estudio di dos mil dollar y un pensioen mensual di 500 dollar pa menornan di edad cu a perde nan mama debi na violencia di genero.

E medida a ser presenta dia 29 di september, e mesun dia di e feminicidio intimo di Ericka de Jesus Rodriguez, asesina cu varios tiro pa su ex casa, cu tabata polis y a usa su arma di reglamento pa tir’e dilanti su yiu muhe di 14 aña, na un restaurant.

“Nos a wak casonan di menornan cu a perde nan mama y, si e ta den e ambiente intimo, e asesino por ta e tata. E menornan ta keda cu otro familiar, manera e welonan, cu hopi biaha, no tin ayudo y ta den crisis economico. Comprendiendo loke e perdida di un persona asina fundamental ta representa den e desaroyo di e crecemento di e muchanan aki, nos a presenta e proyecto aki,” e representante di e partido PIP a splica, ken a insisti ariba e obligacion di e Estado di salvaguardia e bienestar di e menornan aki.

Te cu dia 4 di october, e Observatorio de Equidad de Genero a registra 16 feminicidio intimo e aña aki, den cual 13 di e victimanan tabata mama.

Di otro banda, 25 yiu a perde nan mama pa e violencia di genero, entre nan, 21 menor entre tres y 21 aña di edad.

Jesmarie Rivera Santiago, di 28 aña di edad, tabata un di e victimanan di e aña aki cu tabata mama di un menor di tres aña, el a ser asesina pa e tata di su yiu dia 9 di mei. E asesino a biaha for di Oklahoma algun dia prome cu el a mat’e, a tir’e cu un arma y despues el a tira su mes.

E medida lo atende e casonan di menornan manera victimanan secundario di e feminicidionan, pa sigura cu nan tin reparacion y desaroyo integral, Marquez Lebron a indica.

“E proyecto aki ta un respuesta pa e problema ey. E no ta pa caba cu e problema, si no cu e ta un di e posible accionnan dilanti e feminicidionan. Ohala esaki no mester existi, ohala nos no mester ta legislando ariba e victimanan, pero e tipo di barbaridadnan aki ta sucede na e pais,” el a sostene.

E proyecto ta establece cu e Departamento de Hacienda separa un fondo special, cu lo wordo conoci manera e “Fondo de becas para las hijas e hijos de las victimas de feminicidio,” cu lo wordo usa exclusivamente pa concede beca pa estudio di te cu dos mil dollar.

Ademas e ta busca cambia e Ley de Compensacion y Servicios a las Victimas y Testigos de Delito pa establece un pensioen pa luna, cu ni lo supera 500 dollar, pa beneficio di cada yiu menor di 21 aña.