Na juli 2019, mientras tabatin manifestacion den cayanan di Puerto Rico contra gobernador te na e momento ey, Ricardo Rossello, e mesun Rossello tabata firmando algun ley cu a limita bastante trabao periodistico.
E motibo pa haci esaki ta parce un venganza di Rossello, ya cu e asunto cu e scandal cu a trec’e den problema tabata mas di 900 mensahe di su despacho, cu periodistanan investigativo a logra haya di manera legal. E leynan firma pa Rossello ta limita e acceso na informacion publico na Puerto Rico, asina periodista local y abogado di libertad di prensa a conta e Comision pa Proteccion di Periodista (CPJ, na Ingles).
E ley encuanto Dato Abierto (122) y e ley encuanto Transparencia (141) ta aumenta e cantidad di dia habil cu departamento y otro entidadnan di gobernacion por retrasa suministro di informacion o documento pidi, y no ta duna definicion exacto di e termino “documento publico” segun e Comision. Ta rekeri tambe cu tur peticion pa informacion mester bay via post of e-mail, prohibiendo peticion via telefon o en persona.
Periodistanan a conta CPJ cu e leynan ta haci mas dificil pa nan obtene documento publico, pa papia cu funcionario publico y confia e datonan disponible.
Evaluacion di CPJ di e leynan tambe a duna cu nan ta contene formulacion amplio cu ta duna funcionario di gobierno hopi posibilidad pa nenga peticion pa informacion. Por ehemplo, e ley encuanto transparencia ta bisa cu gobierno por restringi acceso na dato si un funcionario dicidi cu esaki ta toca un interes gubernamental importante o sustancial. Tambe si e interes gubernamental no ta relaciona cu supresion di libertad di expresion. Tambe a elimina e multa di US$ 250 pa funcionario publico cu ta obstaculisa acceso, for di e leynan nobo. E leynan a pasa legislacion sin audiencia publico y contra conseho di diferente gremio periodistico.
