PUERTO RICO: Gobernador ta critica Cuerpo di Ingeniero Mericano

(ElNuevoDia) – Gobernador Ricardo Rosselló a critica e Cuerpo di Ingeniero di Ehercito di  Estadonan Uni (United States Army Corps of Engineers; USACE), pa e labor haci den e reparacion di e infrastructura electrico di e isla despues di horcan Maria.

“E Cuerpo di Ingeniero a carece di un sentido di urgencia,” Rosselló a bisa den conferencia di prensa, ademas di apunta cu, segun su opinion, e agencia federal aki  “a duna poco visibilidad riba e asunto.”

E palabranan di Rosselló a sali ora cu e generacion di electricidad di parti di e empresa estatal Autoridad de la Energia Electrica (AEE) a alcansa 69.8%, leu di e cifra duna despues di e horcan pa e hefe di Ehecutivo cu a duna 15 di december como fecha cu  casi henter e isla lo tabata conta cu servicio reanuda.

Rosselló a indica cu USACE tin “un cultura di burocracia pisa y falta di urgencia.”

E gobernador a reconoce cu no ta spera e yegada di transformadornan necesario pa pone e infrastructura electrico riba pia prome cu 21 di januari, loke ta un contratiempo pa cual mester busca solucion.

Rosselló a resalta cu ademas di trece poste di electricidad pa Puerto Rico, otro material, manera e transformadornan, ta necesario, pa cual el a boga pa un respuesta eficaz pa e problema.

El a detaya ademas cu den e labor di recuperacion di e infrastructura electrico USACE “no ta dirigi” e empresa estatal AEE, cu a haya cantidad di critica pa su supuesto lentitud den duna respuesta na un situacion cu ta mantene gran parti di e isla ainda sin electricidad na momento cu ta bay cumpli tres luna cu e horcan Maria a pasa riba e isla.

“Mi ta bay haci un yamado – na USACE – pa nan aumenta nan sentido di urgencia,” e hefe di Ehecutivo a bisa.

Rosselló a asumi dia 15 di december e responsabilidad pa no a cumpli cu yega na e fecha ey cu 95% di generacion di electricidad pa e abonadonan di AEE. “Mi a pone algun meta agresivo. Mi ta asumi responsabilidad,” el a subraya. El a bisa ademas cu AEE no tabata conta cu e trahadornan necesario pa reconstrui e miles di poste y linea di electricidad cu a cay pa motibo di e horcan.