Manera a anticipa, gobernador Ricardo Rossello a anuncia su renuncia como gobernador diaranson anochi, y un hubilo grandi a explota na Puerto Rico.
E gobernador su renuncia ta programa pa dia 2 di augustus. “Diabierna 2 di augustus, pa 5 or di atardi, na e ora ey mi mandato lo culmina y lo pasa pa e proceso di sucesion, estableci pa nos Constitucion, pa huramenta esun cu na e momento ey lo mester completa e proyecto programa pa e periodo di cuatro aña aki,” Rossello a bisa den un mensahe graba na su despacho na La Fortaleza, den cual el a destaca loke pa su persona tabata logronan di su administracion na e isla. Rossello a declara cu “di acuerdo cu e ordenamento huridico” su sucesor lo ta e actual Secretario (Minister) di Husticia, Wanda Vazquez. E centenares di manifestante cu na e oranan ey ainda tabata reuni na Viejo San Juan, a cuminsa grita di alegria.
Pa mas di un siman, un ola di protesta tabatin e isla den su gara, despues cu mas di 800 pagina di un chat riba e medio Telegram, cu Rossello tabata comparti cu asesor y subalternonan di su alrededor oficial, a bira publico. Den e chat a haci comentario ofensivo contra cierto politico y artista, ademas pa e comunidad LGBT. Esaki a causa tambe cu varios artista di Puerto Rico a uni nan mes na e protestanan.
Prome Rossello a bisa cu e no ta renuncia, pero cu e no lo ta candidato pa reeleccion. Sin embargo, esaki no a calma e protestanan, al contrario. Segun constitucion di Puerto Rico, e prome pa substitui e gobernador ta e Secretario di Estado, pero ya cu e tambe a renuncia, e puesto ta coresponde na Secretario di Husticia Wanda Vazquez Garced.
