Un vivienda a collapse na municipio di Guayanilla y otro tres mas ta bao evaluacion pa e daño sufri ayera despues cu un temblor di 5.8 a afecta varios municipio den sur di e isla.
Alcalde di Guayanilla, Nelson Torres Yordan, a duna detaye di un vivienda cu a cay den otro na sector Villa del Carmen, den bario Playa. Na momento cu e cas a cay aden, e cuatro miembronan di e famia tabata paden, pero no tabatin herido, segun e hefe municipal.
“E famia tabata den e cas, dos menor di 8 y 6 cu nan mayornan, pero no tabatin herido. Nan a perde nan tres auto si,” segun Torres Yordan.
Tambe autoridadnan a cera un vivienda den e bario Indios “preventivamente” debi na un columna cu a kibra. Expertonan cu a bishita e lugar a recomenda pa e residentenan di e dos casnan na ambos banda tambe haya otro lugar di keda, pa nan seguridad.
Mirando e situacion, Torres Yordan a declara ayera tardi un estado di emergencia den su municipio.
“E declaracion di emergencia ta duna nos un oportunidad di por haci algun movimento, si mester haci algun ahuste den presupuesto, si tin necesidad di proyecto di emergencia, manera reubica famia,” e alcalde a declara, anunciando tambe cu e tabata den comunicacion via telefon cu gobernadora Wanda Vazquez.
E conocido formacion parecido na un brug natural y atraccion turistico na Guayanilla, yama Playa Ventana, a collapse ayera bao di impacto di e temblor cu a afecta e municipio tambe.
Di acuerdo cu e oficial di prensa di Guayanilla, Glidden Lopez, e multiple temblornan di ultimo tempo den sur di e pais a causa caba cu parti di e baranca a laga bay, pero cu e temblor di ayera e famoso formacion a stop di existi.
