Gobernador Wanda Vazquez di Puerto Rico a proclama un estado di emergencia pa e isla, pa motibo di e potencial ciclon tropical #9, cu lo pasa cerca di e isla cu biento di mas di 45 miya pa ora y cu hopi yobida.
A traves di un orden ehecutivo, e gobernador a aclara cu e emergencia ta independiente di esun declara pa e pandemia di Covid-19, y a firma un segundo orden ehecutivo pa activa Guardia Nacional di Puerto Rico.
Ya cu no tin cambio den e reglanan di e emergencia pa Covid-19, e reglanan di toque de queda ta keda mescos, di 10:00 p.m. te 5:00 a.m, como tambe e uso obligatorio di mascara.
E alcalde di San Juan, Carmen Yulin Cruz, a haci un yamado na habitantenan di e capital cu ta biba den partinan mas abao cu tin peligro di inundacion o cu tin dak provisional di color blauw, di tempo di horcan Maria, pa busca refugio na algun facilidad cu a prepara pa e paso di e potencial ciclon.
E municipio a financia preparacion di cinco refugio cu capacidad pa 700 persona, banda di dos albergue disponible pa persona sin hogar. Cu e cantidad di yobida cu ta anticipa cu e onda tropical, ta casi sigur cu ta bay tin inundacion, segun Cruz.
E alcalde a admiti cu e no sa cuanto persona lo mester move pa un refugio en vista di e onda tropical, cu por bira tormenta tropical, pero ta opina cu esnan den e areanan mas vulnerable ta recomenda pa no keda na e lugarnan considera peligroso.
