(ElNuevoDia) – E departamento di educacion a anuncia diamars, un beca di 1.000 dollar bao di e programa “Na cas mi ta siña”, cu cual nan ta pretende di beneficia studiantenan di e sistema publico di enseñansa cu tabatin e puntonan mas halto den e testnan cortico cu ta parti di e programa di educacion menciona.
E secretario interino di e agencia, Aliezer Ramos Pares, y e sub-secretario di Asuntonan Academico y Programa, Guillermo R. Lopez Diaz, ta splica den un comunicado di prensa cu e studiantenan interesa tin te cu 30 di september 2021 pa aplica, y e ganadonan lo wordo selecciona dia 15 di october.
E ayudo economico lo ta disponibel pa cada un di e 28 programanan cu ta cay bao di e plataforma di “Na cas mi ta siña”.
“Nos a traha di cerca cu WIPR pa desaroya un plataforma cu por midi e enseñansa di nos studiantenan cu ta ricibi e cursonan, di manera digital como tambe via e programa di television. E programa nan ta un alternativa pa reforsa e habilidadnan, cu cara pa un curso escolar nobo. Cu e beca aki no kier, ademas, incentiva economicamente e studiantenan cu a pone nan educacion como prioridad”, Lopez Diaz a bisa.
E ganadonan di e beca lo wordo selecciona y notifica via e e-mail registra riba e plataforma, y tambe via di e website y e rednan social di e agencia y WIPR.
“E participante mester ta studiante di e sistema publico, registra riba e plataforma di DE y cu un number di studiante valido. Den caso cu dos studiante tin e mesun puntonan, lo evalua e tempo cu e studiantenan a tuma pa completa e les pa determina e ganado”, e dependencia a señala.
