(ElNuevoDia) – E politica gubernamental pa locual ta trata e uzo di tapa boca manera medida di prevencion contra COVID-19 lo keda implementa independientemente di e cifranan abou di contagionan cu Puerto Rico ta experimentando, e secretario di salud, Carlos Mellado Lopez, a bisa diabierna.
Segun e funcionario, no lo flexibilisa e medida aki hustamente pa e volumen halto di trafico di personanan for di huridiccionnan unda cu e cifranan di contagio di coronavirus ta sigui halto manera ta e caso di Merca y otro paisnan den Caribe.
Puerto Rico ta conta cu un porcentahe halto di vacunacion y e tin numbernan abou di contagio. Diahuebs cu a pasa, e proceso di vacunacion di muchanan di 5 pa 11 aña a cuminsa, E cifranan oficial mas reciente di e Departamento di Salud cu ta corespondiente na e resultadonan di diahuebs, ta mustra cu 271 mucha a wordo vacuna na e Departamento di Salud y otro 79 na e Hospital Pediatrico.
“Pa locual ta trata e uso di tapa boca, mi no ta durf di predeci kico lo bay pasa cu COVID-19 pasobra ya nos a yega di faya den nos prediccionnan. E ta dificil mientras cu na Merca, cu ta di unda mas hende ta yega Puerto Rico y e Caribe tin numbernan halto den contagio y numbernan abou den vacunacion, nos ta bay tin cu keda cu e proteccionnan. Mi lo bisa bo cu na momento cu nos wak cu e curva di mortalidad wordo elimina, na e momento cu e hospitalisacion nan baha considerablemente nos lo por cuminsa papia di, kisas, no uso di tapa boca”, Mellado Lopez a bisa. Pero e fiestanan di Pasco ta yegando y nos sa cu na Puerto Rico nan ta wordo disfruta hopi”, el a agrega.
