(ElNuevoDia) – E posibilidad cu un subvariante nobo di COVID-19 ta yega Puerto Rico ta mantene autoridadnan vigilante, net na momento cu Semana Santa ta yegando cerca, un di e epocanan cu mas biahero. Ta trata di XBB.1.16, segun doctor Melissa Marzan, oficial principal di epidemiologia di Departamento di Salud, a informa.
“Organisacion Mundial di Salud (WHO) ta vigilando,” e dokter a splica ariba e subvariante di Omicron cu ya caba a keda identifica na 22 pais, principalmente na India.
Segun WHO, e subvariante aki a tuma control ariba di e otro subvariantenan cu tabata circula na India, convertiendo eynan den esun predominante den ultimo luna, cu 10.500 caso nobo cada siman. Di locual ta conoci te cu awo, e subvariante aki ta similar na XBB.1.5, esun di mas circulacion na Merca actualmente.
“Ta parce cu e ta transmiti mas lihe,” Marzan a comenta, ken a recomenda e biaheronan pa usa tapaboca, specialmente den espacionan cera.
Segun e Centro pa Control y Prevencion di Enfermedadnan (CDC na Ingles), e transmision di COVID-19 ta keda halto cu 30.85% na Merca, mientras cu na 21.57% di su hurisdiccionnan e transmision ta modera cu 36.44% y abao cu 11.13%.
Na Puerto Rico te cu diasabra e tasa di positividad tabata na 10.18%. Solamente tres pueblo, Culebra, Maricao y Rincon, ta un transmision abao.
“Nos ta na alrededor di 300 caso pa dia. E transmision comunitario ta keda halto, pero e nivel di comunidad di COVID, cu ta e hospitalisacion, ta abao, bao di 100 pa dia, incluso e cantidad di mortonan ta abao,” Marzan a bisa.
