Puerto Rico: Denuncia riba falta di coordinacion di servicionan pa menor y adulto cu autismo

(ElNuevoDia) – A pesar cu a registra un aumento den cantidad di personanan cu autismo na e isla, e Alianza de Autismo de Puerto Rico a denuncia cu e fayonan den e coordinacion di servicionan ta persisti, specialmente despues di e diagnostico inicial di e trastorno di desaroyo neurologico.

“E intervencion trempan no ta wordo ofreci na tempo. E programa Avanzando Juntos ta solamente duna apoyo na e famianan, pero ya no tin coordinacion ni ofrecemento di intervencionnan directo pa e muchanan,” Joyce Davila, director ehecutivo di e organisacion a denuncia.

Avanzando Juntos ta un programa di e Sistema de Servicio de Intervencion Temprana , di e division di Mama, Mucha y Hoben di e Departamento di Salud. Su meta ta atende muchanan cu retraso di hasta 36 luna di edad y nan famia.

Cifranan di e Programa di Educacion Special pa e aña academico 2022-2023, ta adverti cu e diagnostico di autismo a subi di un di cinco luga pa di cuater luga entre esnan cu ta ricibi e servicionan aki. Den e ciclo escolar aki, e 10.43% di e studiantenan tabata sufri di autismo, mientras cu na 2012-2013, alumnonan cu e trastorno aki tabata representa 2.64%.

“Esaki ta un crisis di salud nacional,” Davila a comenta.

El a insisti den cu e diagnostico inicial di autismo mester bay man den man cu e vinculacion adecua di servicionan pa cada caso, segun e necesidadnan di e menor.

“Nan por bay e Hospital Pediatrico di e Departamento di Salud pa un diagnostico trempan, pero nada ta pasa pasobra bo tin cu, despues, haya e servicionan pa bo mesun cuenta. Nos tin mester di un sistema integra di diagnostico y intervencion trempan,” el a subraya.

Su comentarionan a surgi durante un conferencia di prensa, hunto cu representantenan di APS Health, unda e compania a organisa un actividad di convivencia pa menornan cu e trastorno aki y nan mayornan.

“E razon di e prevalencia asina halto ta multifactorial, pero principalmente pa e identificacion trempan di pashentnan cu sintomanan cu nan por ubica den e spectrum aki,” Jose Massa, vice presidente di Asuntonan Medico di APS, a comenta di su parti.

El a sostene cu e desaroyo di campañanan educativo ta yuda pa e mayornan di menornan cu sospecha di e trastorno aki ta mas informa y por busca asistencia medico trempan.

“Esaki no ta un trastorno di salud mental, e ta un spectrum cu ta varia di caso pa caso, for di un nivel di funcionamento limita pa uno hopi avansa,” el a enfatisa.

E psikiatra a señala cu e prome bishita na e pediatra despues di e nacemento di e baby ta primordial pa un evaluacion di crecemento.

“Ta importante cu tur proveedor tin un lista di servicionan cerca di nan comunidad of unda pa bay, cu e numbernan di telefon y emailnan,” el a sostene.