Puerto Rico: Cu un marcha riba 8 di maart e Coalicion 8M ta busca pa resalta e poder politico di hende muhe

(ElNuevoDia) – Cu enfasis ariba e importancia di e voto di hende muhe durante e eleccionnan di e aña aki, y den conmemoracion di e mas di 50 aña di e prome manifestacion na Puerto Rico riba e Dia Internacional di Hende Muhe, e Coalicion 8M a convoca diadomingo un marcha cu ta bay tuma luga dia 8 di maart, saliendo for di e Oficina de la Procuradora de la Mujer (OPM) te na e Comision Estatal de Elecciones (CEE).

E Coalicion 8 de Marzo (8M) a scoge e ruta di OPM te na CEE pasobra e ta simbolisa e afirmacion di e poder politico di hende muhe, e grupo a subraya, cu ta consisti di alrededor di 50 organisacion.

Ademas e organisacion, durante un conferencia di prensa, a bisa cu e actividad ta bay sirbi pa conmemora e prome protesta na Puerto Rico pa e Dia Internacional di Hende Muhe, cu a tuma luga na 1974 y cu a wordo organisa pa e grupo feminista Mujer Integrate Ahora (MIA), funda na 1972.

“For di e momento ey, e marcha aki a wordo celebra sin interupcion na Puerto Rico. MIA tabata lucha pa igualdad – di salario, educacion, derechonan – como tambe pa e autonomia y emancipacion sexual y reproductivo di hende muhe. Nan tabata pioneronan den e lucha pa legalidad di aborto y pa despenalisa prostitucion,” Alice Perez Fernandez, vocero di Coalicion 8M a bisa.

“Nos ta kere ta importante pa recupera e historia di e eventonan aki y nan legado pasobra e lucha di e hende muhe di e tempo ey ta sigui ta significativo awendia,” el a apunta.

Tocante e conmemoracion di e proximo 8 di maart, Angelica Acosta Buono, otro vocero di e entidad, a opina cu esaki ta necesario pa “por genera e cambionan den politica publico y di prevencion necesario pa detene e cifranan creciente di feminicidio y violencia contra hende muhe, nos mester, entre otro, educacion cu perspectiva di genero y personanan den gobierno cu ta comprometi den atende efectivamente e problema aki.”

Acosta Buono a sostene cu, for di e perspectiva di derechonan humano di hende muhe, e institucionnan gubernamental tin e deber di protege y garantisa e seguridad y bida. “Nos ta demanda pa e institucionnan aki cumpli cu nan deber, pasobra actualmente nan no ta haci’e,” el a bisa.

E vocero a recorda cu, te cu aworaki den aña 2024, a registra 19 feminicidio, segun e datosnan di e Observatorio de Equidad de Genero. “Cada un di e bidanan aki cu ta bay perdi pa motibo di violencia di genero ta demostra e falta di compromiso y e incapacidad di e gobierno actual,” el a señala.