E ayudo cu Puerto Rico tin mester pa logra su reconstruccion despues di horcan Maria ta keda tranca pa e actonan di corupcion cu ta bao investigacion di autoridadnan federal y cu lo desemboca den aresto, segun alcalde di San Juan, Carmen Yulin Cruz, a splica prensa diadomingo pasa.
“Tur esey ta duna Donald Trump municion pa e por bisa ‘told you so’ y lo bay retrasa distribucion di e fondonan”, e prome funcionario di San Juan a conta prensa na un evento pa celebra ultimo diadomingo como ‘Dia di Orguyo Trans’.
E expresionnan di Cruz ta bin na momento cu e Representante Federal di Investigacion ta trahando riba varios caso di posibel corupcion den areanan di Salud, Enseñansa, y Finanzas. E investigacionnan ta canando den mesun siman unda cu Raul Maldonado, ex-Secretario di Finanzas y ex-Director di Oficina di Gerencia y Presupuesto, a denuncia publicamente cu den e organismo aki tabatin ‘un mafia institucionalisa y actonan di corupcion’.
E declaracionnan publico di Maldonado a cost’e su puesto y oranan despues di su destitucion su yiu, Raul Maldonado Nieves, a acusa gobernador Rossello di ta corupto y inepto. Despues di un par di dia, e comisionado di Polis, Henry Escalera, a anuncia cu tin un investigacion ‘pacifico’ contra yiu di Maldonado.
Alcalde Carmen Yulin Cruz tabatin critica duro riba Trump desde e devastacion cu horcan Maria a causa dia 20 di september 2017. Trump a contesta e alcalde y gobernador Rossello bisando cu e isla tin un gobierno corupto.
Cruz a bisa den Camara di Representante cu tin ‘un gran expectativa’ cu gobernador Ricardo Rossello Nevares ‘por fin ta lanta y defende interes di pueblo di Puerto Rico’.
