Secretario (minister) di Husticia Wanda Vázquez a bira Puerto Rico su Gobernador nobo ayera tardi, e di dos hende muhe pa ocupa e puesto, despues di simannan di agitacion y turbulencia. Algun ora prome cu su huramento Corte Supremo a rechasa e nombramento y huramento di Pedro Pierluisi, e candidato preferi di ex gobernador Rossello, como inconstitucional.
Compaña pa su casa, Hues Jorge Díaz, y su yiu muhe, Vázquez a huramenta tempran ayera nochi na Corte Supremo, prome cu el a sali sin duna algun declaracion. “Puerto Rico mester di siguridad y stabilidad,” el a bisa mas tempran. “Nos accionnan mester ta dirigi na e meta ey, y esey ta loke semper mester bin prome.”
E decision unanime di e Corte, riba cual no por tin apelacion, a caba cu e disputa tocante ken lo mester dirigi e teritorio Mericano despues cu e podernan politico tradicional a keda seriamente cuestiona pa e protestanan riba caya cu tabata critica corupcion, mal maneho di fondo y un chat di mal gusto cu tabata involucra gobernador Rossello, cu despues di simannan di agitacion a tuma e decision pa renuncia.
Pero ta anticipa mas disturbio ainda, ya cu hopi persona a laga sa caba cu nan no kier Vazquez tampoco. Vazquez anteriormente a nenga e puesto ora esey a bin den discusion, pero finalmente a acepta awor pasobra e ta e siguiente persona pa e puesto, segun ley.
Pierluisi a bisa cu el a bin dilanti pa yuda e isla “den fe y deseo pa contribui na futuro di e pais,” pero cu e ta respeta e decision di e Corte. “Mi mester hala un banda y apoya secretario di Husticia, honorabel Wanda Vazquez Garced,” el a declara den un comunicado poco prome cu e huramentacion.
