Puerto Rico ta desafiando gobierno Mericano adoptando un ley ayera pa mantene pelea di gai, buscando pa duna proteccion na un tradicion di 400 aña riba e isla, a pesar di un prohibicion federal cu ta drenta na vigor e siman aki.
Esnan den negoshi di pelea di gai ta cuidadosamente optimista tumando na cuenta cu e teritorio Mericano ta tratando di evadi un ley federal cu presidente Trump a firma un aña pasa.
“Nos sigur ta desafiando un ley federal. Nos sa kico esey ta implica,” Representante Gabriel Rodriguez Aguilo, cu tabata co-autor di e ley, a bisa Associated Press prome cu a haci e anuncio ayera. Rodriguez a bisa cu e ta anticipa cu e pelea lo bay termina den corte federal.
Mientras e noticia di e aprobacion a plama, esnan den e industria a aplaudi e noticia mientras algun di nan a reuni cu gobernador Wanda Vazquez, ken a anuncia dialuna cu e tin plan pa participa den eleccion na 2020.
“Lo ta bay tin trabao!” Domingo Ruiz a grita, ken tin mas di 30 gai y tabata mas di cincuenta aña den e negoshi. “Nos ta bay tene e pelea bibo.”
Pelea di gai ta genera alrededor di $18 miyon pa aña y ta emplea como 27.000 persona, di acuerdo cu e ley cu a haya aprobacion di Camara di Representante y Senado di Puerto Rico. E legisladornan di e isla a critica e ley di Trump, bisando den nan proyecto di ley cu pelea di gai y pusta placa riba esey ta “parti di nos cultura y folklore desde su introduccion na Puerto Rico den siglo 17.”
