E comisionado na Washington pa Puerto Rico y e director ehecutivo di e Administracion di Asunto Federal pa Puerto Rico (na Ingles: PRFAA), a comenta riba e consecuencianan di e fracaso di e plan di gobierno di president Donald Trump pa substitui e plan medico di gobierno di Obama, conoci como Obamacare. Jenniffer González y PRFAA ta sigura cu e pais a gana tempo pa continua cu e lucha na fabor di igualdad den acceso na fondonan federal.
E comisionado residente na Washington, Jenniffer González, a considera cu e retiro di e proyecto republicano pa reforma e sistema di salud di Merca y trata di deroga Obamacare, por habri porta nobo pa e isla. E legislacion cu a introduci den Camara di Representante, y cu a keda retira na ultimo momento diabierna pasa, despues cu debate fuerte den seno di partido y den pleno, no tabata inclui Puerto Rico.
“Esaki ta habri e wega completo”, el a señala, indicando cu nan lo sigui insisti pa inclui por lo menos un asignacion cu ta duna continuidad na e fondonan di Medicaid di Obamacare den “cualkier vehiculo legislativo”. “Nos a gana tempo pa continua nos lucha na fabor di igualdad den acceso na fondonan federal di salud”, a indica di su banda e director ehecutivo di PRFAA, Carlos Mercader. Cu o sin Obamacare, Puerto Rico por perde na final di 2017 o principio di 2018 cerca di $1.200 miyon anual cu tabatin na vista pa e isla den fondo di Medicaid.
Esaki lo haci e situacion precario di e isla mas pio ainda, cu ta luchando cu un economia debil y un exodo grandi di poblacion cu ta bay biba na Merca. Esaki ta debilita e base financiero di gobernacion cu ta mira su entradanan disminui, mientras cu ta ehecutando caba un plan di austeridad.
