(ElNuevoDia) – Contrario na locual ciudadano y ambientalistanan a bisa, gobierno estatal y federal, ademas di administracion municipal, a respalda e construccion di un hotel dilanti e centro turistico La Monserrate, na Luquillo, bao di e promesa cu e empresa cu lo desaroya e hotel ya a tuma y lo implementa medidanan nobo pa mitiga cualkier daño na e ambiente natural, incluyendo e impacto directo na un area di wetland (humedal).
Di un banda, e coalicion Salvemos el Wetland a insisti ayera cu e proyecto ta supone e destruccion masivo di e wetland Monserrate, pero di otro banda, e Departamento di Recursonan Natural y Ambiental (DRNA) y e alcalde Jesus “Jerry” Marquez, a coincidi cu e proyecto di e empresa Luquillo Hotel Company, tocante e obra, cu a cuminsa cu construccion poco tempo atras, ta sigui e leynan y reglamentonan aplicabel.
“E lucha apenas ta cuminsa y nos obhetivo ta cla, pa no tin construccion ni destruccion di e wetland. Nos no ta contra e desaroyo na Luquillo, pero nos no por destrui un ecosistema asina importante manera esaki, cu ta yuda controla e inundacionnan den e municipio”, Zoraya Castro, vocero di e coalicion a bisa,
Segun Castro, door di apoya e proyecto, e gobierno “a bira nan lomba pa pueblo” y a “ignora” e leynan di preservacion di e wetlandnan y di desaroyo turistico selectivo. Esun ultimo aki, el a splica, ta promove e uso di structuranan existente pa establece hotelnan, “sin impacta di manera preocupante e recursonan natural”.
Di su parti, e alcalde a indica cu el a apoya e proyecto pasobra, “ora cu nan a presenta e proyecto na mi persona, e tabata stipula den un tereno pa e tipo d actividad aki, cu e consulta di ubicacion necesario y e permisonan y autorisacion di e Cuerpo di Ingenieronan y Recursonan Natural, cu ta e entidadnan cu hurisdiccion den e tema”.
