Departamento di Salud di Puerto Rico a añadi ayera 44 caso positivo nobo di coronavirus Covid-19, loke t trece e cifra total di contagio na e isla na 1.968.
Mientras tanto e cantidad di fayecimento relaciona cu e enfermedad a keda na 99, despues cu e agencia no a anuncia mas morto. No obstante, e cifra aki por aumenta proximamente debi na e hecho cu e Registro Demografico ta actualisando su datonan despues di problema tecnico den nan sistema di informacion. “Tal fayecimentonan lo keda reporta den e proximo informenan,” segun un comunicado di prensa di e agencia.
Tambe e entidad di Salud a splica su metodo di ‘contact tracing’ di Covid-19 na Puerto Rico. Pa motibo di varios critica cu no tin contact tracing, pa prome biaha e departamento a duna detaye con ta bay realisa e proceso importante aki durante e pandemia di coronavirus. Aunke e agencia no a inclui den e informe di ayera e total di prueba di Covid-19 realisa na Puerto Rico, e secretario (ministro) di Salud, Lorenzo Gonzalez Feliciano, a bisa den un conferencia di prensa cu e cifra ey a yega na 61.515 entre prueba molecular y serologico.
Aunke e situacion na Puerto Rico no ta asina grave manera na Republica Dominicana, tampoco e ta sin peligro. Cu casi 2.000 caso detecta, y 99 morto, e pais cu ta menos di un tercio di Republica Dominicana (11,5 miyon habitante), no ta keda asina leu tampoco di e 8.807 caso y 362 morto registra na Republica Dominicana. E diferencia ta den e ritmo di caso nobo, cu na Puerto Rico ta bao 50 pa dia (ayera 44), mientras na e isla ruman e aumento entre dia 5 y 6 di mei ta mas di 572 caso nobo.
