E miembro di Camara di Representante di Puerto Rico, Jackie Rodriguez a divulga ayera e contenido di un informe di Departamento di Salud unda ta revela cu e hositalnan di e isla ta atende un promedio di 800 caso di abuso sexual mensualmente, y cu anualmente ta registra 16.000 denuncia di e tipo aki.
Mirando e cifra alarmante aki, e parlamentario pa Partido Nuevo Progresista (PNP) a presenta un resolucion pa Comision di Turismo y Bienestar Social investiga e incidencia di abuso sexual contra menor.
“Esaki ta inaceptable y nos mester evalua e medidanan cu gobierno a implementa y identifica iniciativa adicional pa eradica tal abuso,” e parlamentario a indica den algun declaracion skirbi despues di haci contenido di e informa publico.
Rodriguez a declara cu segun e datonan di Centro di Ayudo na Victima di Violacion di Departamento di Salud, 79% di e casonan di abuso sexual reporta a ser cometi pa famliliar di e victima.
Mientras cu 80% di e denuncianan pa algun tipo di agresion sexual ta reporta pa hende muhe victima, 35% di e delitonan reporta ta pa agresion sexual y 60% pa acto inmoral.
Un grafico publica riba e webpage di Salud ta mustra cu pa aña fiscal 2017-2018 tabatin 679 caso activo di abuso sexual na Departamento di Famia.
Tambe, un estudio realisa pa Salud na 2018, a revela cu diariamente dos menor victima di abuso sexual ta ricibi ayudo den sala di emergencia na e isla. 79% di e victimanan cu ta haya servico di e tipo aki na hospital ta bao 18 aña.
Rodriguez ta afirma cu e isla “ta biba den un violencia sexual imbatible” cu no a logra dtene cu exito, cu e campañanan di prevencion y concientisacion realisa.
