Desde cambio di gobierno, por a nota un discrepencia entre e pensamento di e actual minister encarga cu deporte Dangui Oduber (MEP) y fundacion Lotto Pa Deporte (FLPD). Segun e minister a yega di declara na varios ocasion, e no ta comprende e postura tuma pa e hunta di supervision, cu entre otro no kier tuma retiro di forma boluntario. Na banda di e comunicado di prensa cu e minister a manda, Bon Dia Aruba tambe a tene un combersacion corto cu e minister riba e asunto aki.
Segun e minister ta declara den un comunicado, ‘den caso di un cambio den gobernacion ta usual cu miembronan di e hunta di supervision apunta door di gobierno anterior ta tuma nan retiro boluntario prome cu nan wordo retira door di gobierno, asina dunando honor na nan mes’.
E minister ta enfatisa cu ‘gobierno nobo nifica maneho nobo’. “Asina e ta na Merca, Hulanda, Corsou y hopi otro pais mas. Gobierno ta apunta su hunta di supervision cu e ta sinti cu ta bay ehecuta e maneho segun su expectativanan y condicionnan. Logicamente esakinan ta personanan cu e ta confia pa eherce nan trabou bou di su gobernacion.” Pa es motibo, segun e minister ta bisa, haciendo uzo di articulo den statuut, a manda carta pa retira nan.
Hunta di supervision
Segun e mandatario, e hunta di supervision di FLPD no kier tuma nan retiro boluntario y tampoco kier acepta e retiro for di gobierno. “Gobierno, e organo cu ta kita y pone via statuut. Y te ainda esaki ta den statuut skirbi. Gobierno ta esun cu tin e poder y derecho, conforme ley.”
Ademas, e minister no ta compronde pakico e miembronan di e hunta di directiva no kier retira. E compensacion pa ta miembro di e hunta di directiva normalmente ta un fraccion di nan salario. Esey caba ta straño segun e minister ta splica den su comunicado. “Pakico bo no kier sali? Kico tin eyden cu bo tin asina tanto interes pa keda? Y tampoco bo no por defini ta cuanto aña mas bo kier keda. Bida largo? E compensacion cu nan ta ricibi mensual/anual no ta un cifra cu bo ta depende di dje pa cria bo mes y of bo famia.”
Cambio den statuut
Ora e resultadonan di eleccion a drenta, indicando cu lo ta bay tin cambio den gobernacion, e hunta di directiva aki a haci cambionan den e statuut segun e minister ta splica. “Hunta di supervision ta bisa cu e tawata algo andando di hopi tempo caba. Straño ta cu net e dia aki bo ta scoge pa haci un cambio asina drastico den bo statuut. Ta parce como si fuera nan no kier sinta 4 ni 8 aña sino hopi mas.”
Bon gobernacion
“Segun normanan di bon gobernacion, un buki cu Prof. dr. Frank Kunneman a contribui na dje, cu por cierto ta e abogado cu ta representa FLPD den corte, tambe ta un buki cu nan ta duna les na esunnan den mundo corporativo, ta sugeri pa cualkier miembro di un hunta di directiva no pasa mas cu 8 aña sinta den e mesun stoel di e hunta directiva.” E minister den contacto cu Bon Dia Aruba ta bisa nos den e parti aki cu un bos firme: ‘Manera mi a bisa na varios ocasion, y mi ta bise un biaha mas, bo tin di practica locual bo ta predica.’
Corte
E comunicado di e minister ta bisa cu e hunta di supervision di FLPD ta sinti y ta haya cu nan no mester wordo retira y ta bay over na entama un caso contra di gobierno, creando obstaculonan pa e minister por hiba su maneho, ‘un maneho di bon gobernacion y pa bienestar di nos deportistanan’.
“Apesar cu nan ta bisa cu nan kier traha cu minister, nan no kier contesta preguntanan di minister, nan no ta respeta locual statuut ta indica, nan no kier duna cuenta anual di FLPD, nan kier sigui sinta den e stoel y pa gobierno traha cu nan obligatoriamente.”
Segun e mandatario, hues a haya ta bon, pa keda sin wak articulo den statuut y ta sinta den stoel di gobierno, uno eligi door di pueblo y ta tuma decision pa nan. “E tumando rol di uitvoerendemacht di gobierno. Hues no ta considera niun punto cu gobierno a trece pa defende su decision, entre otro articulo den statuut y conseho di bon gobernacion di Profesor Kunneman. Hues kier a considera e caso ‘niet ontvangelijk’. Esey kiermen e no tin decision riba dje.”
Iregularidad
Despues di e caso, e minister encarga cu deporte ta vocifera su malcontento cu e decision di hues, pero ‘naturalmente ta respeta esaki’.
“Mientras simannan ta bay, gobierno ta constata varios iregularidad cu ta tumando luga cu hunta di supervision di Lotto pa Deporte y nan directiva. Minister como parti di su tarea pa supervisa deporte, ta cuminsa haci pregunta na hunta di supervision y director.
“Cierto pregunta so ta haya contesta y semper via abogado particular, cu por cierto tin un tarifa hopi halto. Hasta director ta haci uzo di abogado particular pa contesta. E mes no kier contesta ningun carta y tampoco ta haci uzo di su hurista cu e tin den cas.” Riba e parti aki sr. Oduber ta bisa Bon Dia cu e no ta comprende ki tipo di intencion e personanan aki tin pa deporte di Aruba. Segun e mandatario, nan tey pa traha pa deporte y no pa saco propio.
Mas caso den corte
Mientras cu hunta di supervision ta falta pa manda contestanan ‘crucial y importante’ segun minister Oduber, e fundacion ta bay bek corte bisando cu gobierno ta stroba nan di traha y cu mester pone un dwangsom pa si gobierno stroba atrobe.
“Den e vonnis ta parce cu gobierno no a manda un abogado pa defende nan den corte y a solamente bisa: Land Aruba voert hiertegen verweer, met vordering tot veroordeling van FLPD c.s. in de proceskosten. Ta mustra como sifuera e abogado tabata un no show.”
E minister ta puntra: “Dicon no ta inclui tur e echonan cu abogado di gobierno a trece padilanti? Dicon hues no por a considera nan puntonan, cu por cierto ta netamente empugna cu e statuut atrobe? Paso atrobe, si hues considera un di nan, e no lo por a dicta na fabor di su colega, e otro hues cu a dicta den e prome caso. Nan lo mester keda alinea cu otro? E por ta cu un colega no kier laga e otro cay?”
“Dus, nan a opta pa no consideranan mes, ya ora otro hende lesa vonnis ta como sifuera cu no tabata tin niun punto valido pa defende gobierno su banda.”
Segun e mandatario, e echonan treci padilanti pa abogado di gobierno cu a wordo completamente ignora ta:
Wernet ta cobra un suma di mas o menos Afl.200.000,- banda di su compensacion cu e ta haya caba como director.
Cartanan manda pa FLPD semper ta wordo contesta door di abogado, pues ta contene solamente terminonan huridico, cual no por conduci na un bon comunicacion entre minister y FLPD. Mas bien, minister nunca por tin nada di bisa.
FLPD tin retraso den relatonan financiero cu 4 aña. Esaki ta contra di nan mesun statuut. Conforme nan statuut nan tin cu entrega relato financiero di e aña anterior dentro di 7 luna.
Miembronan di hunta di directiva na mesun momento tambe ta of tabata forma parti di sea FFD y/of Sportsubsidie cual ta contra di nan statuut tambe.
“Hues no ta considera niun iregularidad treci padilanti di parti di gobierno, pero ta bay over na dicta cu minister mester cera su boca sino e ta haya boet di 2 miyon, pero e por sigui haci pregunta na hunta di supervision.”
Segun e comunicado di e minister, hues ta bisa cu gobierno mester stop di molestia nan y laga nan haci nan trabou, cual ta supervisa pa gobierno. “Den otro palabra, nan mester supervisa pa gobierno, pero nan no mester raporta na gobierno locual nan ta supervisa.”
E mandatario ta sigui bisa cu lo ta bon si hues por defini molester. “Kico ta molester? 1 carta pa siman, 1 carta pa luna of 8 carta pa aña? Conclusion di hues ta indica cu si ta un molester pa un minister puntra den nomber di gobierno ariba situacionnan caminda tin iregularidad. Hues a solamente considera e hecho cu minister a haci pregunta tocante iregularidadnan, manera corupcion di placa cu a wordo prueba den corte, pero esaki pa e hues tabata irelevante. E hues a solamente worry cu mi a haci pregunta y a previa e hunta di directiva door di pone un multa, mientras cu e hunta di directiva ta kibrando ley.”
Segun minister Dangui Oduber, un caso simpel manera esaki, si hues lo a considera gobierno su puntonan, hues lo tabata obliga pa dicta ful otro. “Hues ta hasta a duna su comentario personal den corte y tambe e ta pone den e vonnis cu probablemente gobierno lo bay perde den bodemprocedure. Pakico hues no a tuma e decision ey dibiaha? Pakico warda ful un proceso di bodemprocedure? Toch e no a considera niun punto di gobierno.”
Na final e mandatario ta bisa cu consecuentemente, hunta di supervision ta keda sinta riba stoel, mientras gobierno ta keda man mara. “Pakico hues lo dicta e sentencia aki? E consecuencia di mas obvio ta cu nan ta haya 1 aña mas sigura den e stoel sinta. Deporte ta stagna y tur hende conoce e dicho ‘stil staan is achteruit gaan’.”
