E pueblo indigena yama ‘Ponchos Rojos’ di e altiplanonan di Bolivia a cuminsa un blokeo di caminda ayera dialuna pa exigi retiro di e mandatario, Luis Arce, y e vice presidente, David Choquehuanca, debi na falta di dollar y combustibel, ademas di acusa nan di promove division di organisacionnan social.
E lider principal di ponchos, David Mamani, a declara cu e protesta campesino ta un welga indefini “te ora cu e presidente di Estado, Luis Arce, y su vice presidente, David Choquehuanca, renuncia,” y lo convoca eleccion nobo “lo mas pronto posibel.”
Decenas di manifestante tabata staciona riba e camindanan principal cu ta conecta La Paz, sede di Conseho Ehecutivo y Legislativo di Bolivia, cu interior di e pais, algun municipio bisiña y e autopista internacional pa Peru.
Na e puntonan di blokeo, a cende candela, a pone piedra y mondi di tera of escombro pa stroba e pasashi di vehiculonan, na mes momento cu personal di Polis a purba convence esnan mobilisa pa permiti e circulacion, segun EFE.
Diadomingo anochi, presidente Arce a emiti un mensahe televisa den cual el a acusa e ex-presidente y lider di e partido na mando, Evo Morales (2006-2019), di a purba corta su mandato y a orkestra un blokeo di caminda indefini cu “lo termina den un intento di “golpi di estado” pa impone su candidatura presidencial.
Morales y su sectornan leal lo cuminsa un marcha awe for di e estado di Caracollo, 190 kilometer zuidoost di La Paz, pa protesta contra e situacion economico y pa defende e Movimiento al Socialismo (MAS) di un intento di “proscripcion.”
E ex-gobernador a nenga cu e protestanan ta pa faborece su candidatura, pero mas bien cu nan ta e “malcontento di e pueblo pa cu un Gobierno cu a proteha corupcion, cu nunca a haci nada pa soluciona e crisis, cu a garantisa e extension ilegal di magistradonan.”
Den e sentido aki, Oficina di Defensor di Pueblo ayera a pidi, den un declaracion, autoridadnan nacional y lokal, ademas di e sectornan cu ta tene protesta, “pa keda trankil y evita accionnan cu por conduci na actonan di violencia y conflicto mas grandi den e pais.”
Morales y Arce a keda aleha for di fin di 2021 y aña pasa nan diferencianan a profundisa door di un congreso nacional di e partido den cua, den ausencia di e presidente y su sectornan leal, Evo Morales a ser ratifica como lider di MAS y a eligi “candidato unico” pa e eleccionnan presidencial di 2025.
Arce y Vice-presidente Choquehuanca no tabata na e reunion ey, den e pueblo di Lauca Ñ, mirando cu e organisacionnan social, e base di e partido, no tabata representa manera mester ta.
