Prome, shelo a bira scur, despues a bin e sombranan den forma cresciente riba suelo, y finalmente un erupcion di grito di e multitudnan cu a reuni diasabra rond di e paso di e inusual eclipse solar “ring of fire.” E tabata un show espectacular pa miyones di persona na continente Americano mientras e Luna a posiciona su mes y a blokea tur luz cu excepcion di un circulo briyante di e borde di Solo.
E evento astronomico aki a cuminsa na Aruba pa alrededor di 12:43pm, momento cu e Luna a cuminsa su biahe haciendo prome contacto cu Solo. Esnan observando por a bira un ‘mordi’ chikito di e Solo. E peak tabata pa alrededor di 2:27pm, ora e eclipse a alcansa su cobertura maximo pa Aruba, cu como 61% di e Solo tapa pa e Luna. Esaki a crea un figura significantemente cresciente di e Solo visible. Finalmente, e Luna a finalisa su paso door di Solo pa alrededor di 4:02pm, marcando e fin di e evento.
Na Aruba, hende a observa e eclipse aki for di varios punto, un di nan, na EPB Hato unda a tuma lugar e evento Aruba AstroFest 2023: Eclipse Edition. E AstroFest tabata un fiesta di ciencia unda esnan presente por a disfruta di varios instalacion y actividad.
Muchanan hopi emociona tabata hunga weganan clasico ofreci pa Coder Dojo usando remote di Nintendo, mientras otronan tabata observa diferente experimento y instalacion cientifico, incluyendo di abeha y di planetanan. Ademas tabatin cuminda y ambiente di fiesta.
Pafo, Space and Nature Aruba Foundation tabatin varios telescop posiciona unda esnan presente por a observa shelo y ricibi informacion di con e telescopnan aki ta traha. Ademas tabatin un caha traha special, ‘Solar Projector’ pa por mira e paso di e eclipse di un manera safe. Manera varios instancia a adverti, no tabata posible pa mira e eclipse directamente sin proteccion di wowo. Esaki pa motibo cu Solo ta emiti rayonan ultravioleta poderoso cu por causa daño severo na wowo.
Tambe presente na e evento tabata e conocido cientifico Arubano, Dr. Edward Cheung. Bon Dia Aruba a combersa cu Dr. Cheung tocante su experiencia di e evento astronomico cu el a disfruta e biaha aki na Aruba. El a bisa cu pa e evento aki, tabatin “masha interes mes.”
“Ami tabata kere cu un evento cu ta cuatro ora largo, nos lo para rond, warda pa solo haci algo, wak e atrobe, bin pafo. Pero henter dia tabatin hende. Nan tur kier a mira e Projector.”
E Projector en berdad a proba di ta hopi popular, cu un rij di hende wardando nan beurt pa mira e eclipse door di dje. “Bo ta haya un chens pa mira e Solo cu bo mesun wowo,” Cheung a bisa. “Y tur e muchanan a bisa ‘wooow!’. Mi nunca ta fada di e zonido ey di nan.”
Eventonan astronomico manera un eclipse ta un bon oportunidad pa laga muchanan desaroya un interes den ciencia y astronomia, ya cu ta un evento cu probablemente nan no a yega di experimenta, y probablemente tampoco lo bolbe mira te ora cu nan bira adulto. Cheung a bisa cu “ta tuma dies of binti aña prome cu un otro eclipse lo bin Aruba.” Pues ta un privilegio pa por presencia esaki. Igualmente, Cheung a bisa cu compara cu e ultimo eclipse total na aña 1998 na Aruba, cual tabata “hopi leuk,” toch e evento e aña aki “a hacie hopi mas leuk pa mi, pasobra mi tabatin hopi interaccion cu e hendenan.”
Proximo april tin un eclipse total di solo cu lo pasa door di Merca den e direccion opuesto, cuminsando na Mexico y bay for di Texas na New England prome cu caba na Canada. E eclipse aki ta bay ta parcialmente visible na Aruba.
E siguiente eclipse ‘ring of fire’ ta bay ta na october di proximo aña na e punto mas sur di Sur America. Antartica ta bay mira un na 2026.
Ta bay ta te 2039 prome cu otro ring of fire ta bay ta visible na Merca, y Alaska ta bay ta e unico estado den su ruta directo.
*Cu informacion di Associated Press y Space and Nature Aruba Foundation.
