Ayera Aruba a celebra Dia di Betico conmemorando e fecha natal di libertador Gilberto Francois “Betico” Croes. Un dia yen di diferente actividad rond di Aruba y pueblo di Aruba a sali pa disfruta y celebra e dia special aki.
Manera ta custumber e celebracionnan oficial ta cuminsa dia 24 di januari anochi cu e manifestacion cultural ariba Plaza Betico Croes na unda publico por disfruta di un anochi yen di diferente presentacion cultural y tambe diferente tent cu tin cumindanan crioyo, artesano, arte y mas.
Dia di Betico ta cuminsa cu e ceremonia protocolar cu ta tuma luga di 25 di januari, diahuebs mainta, ariba Plaza Betico Croes organisa pa Comision Celebracion Dianan Nacional (CCDN) hunto cu Gobierno di Aruba.
Na e ocasion aki Prome Minister Evelyn Wever-Croes a duna su discurso na unda el a conta un poco di e historia di difunto Betico Croes. El a enfatisa su trayectorio como politico cual tabata uno impresionante.
“E stimacion cu el a demostra pa su isla natal tabata asina grandi y esaki tabata visibel a traves di e lucha tenaz cu el hiba pa logra e deseo di e pueblo Arubano, esta un Aruba autonomo den Reino Hulandes. Betico a transforma su stimacion y felicidad pa su pueblo mediante su propio yiunan bisando cu e felicidad cu mi ta desea pa mi propio yiunan ta e felicidad cu mi ta desea pa henter e pueblo di Aruba,” el a remarca.
El a recorda cu e lucha cu Betico Croes a hiba pa saca Aruba for di e constelacion Antiano, no a bay asina facil y no a bay sin sacrificio. Sacrificio cu a inclui manifestacion- y protestanan, su encarcelamento inhusto, tambe durante e Referendum Consultativo y e accionnan di Augustus scur na 1977.
“Pero tabata danki na e accionnan aki cu porfin Hulanda a dicidi na 1981 di duna atencion na e lucha di nos pueblo reconociendo e derecho di autodeterminacion. Y con e lucha pa nos libertad a culmina durante e Conferencia di Mesa Rondo na maart 1983 na Hulanda, caminda Aruba bao liderazgo di Betico Croes a logra su Status Aparte, esta un pais autonomo den Reino Hulandes cu su propio Gobierno, propio Parlamento, propio Gobernador, propio moneda y propio instrumentonan economico pa desaroya nos pais exitosamente,” Prome Minister a resalta.
Desde mainta tambe ciudadnan por a bishita diferente luga rond di e isla na unda tabatin actividadnan pa celebra Dia di Betico. Un di e actividadnan hopi popular cu ta wordo hopi bishita ta na Museo Archeologico Nacional Aruba (ANA).
Margarita Wever, hefe di Departamento di Educacion y Presentacion di Museo Archeologico Nacional Aruba a splica cu specialmente pa Dia di Betico e museo tabata habri for di 10or di mainta pa 2or di atardi.
Pa celebra e dia aki tabatin diferente actividadnan leuk pa full famia y tabatin experiencianan completamente nobo tambe.
El a sigui splica cu e artista Sharelly Emanuelson a habri un exposicion temporario nobo y a haci presentacion interactivo cu esnan presenta cu a logra registra pa participa den su presentacion.
Wever a sigui conta cu e artista local Natusha Croes a crea dos produccion audiovisual. Uno ta titula “Lama ta Caminda” cual ta conta e lasonan estrecho entre tera firme y bario di Rancho cu ta e bario di piscadonan. E otro produccion ta titula “Awa ta Bida” y publico presente por a registra tambe pa e oportunidad di presencia e produccion aki den persona.
Durante e actividad tabatin presentacion di cuater mini documentario cu a ser traha specialmente pa e proyecto “Manteniendo herencia na Bida” cu ta conta e historia di Aruba di cada epoca.
Otro actividad hopi gusta y bishita ta na Archivo Nacional Aruba (ANA). Aki Natalia Rodriguez, documentalista na ANA, a splica cu en conexion cu Dia di Betico ANA a habri su sala di exposicion cu ta yama “Diaspora Arubiano” cu a wordo inaugura 18 di maart 2023 y como ta custumber cada 18 di maart ta bolbe cambi’e.
El a indica cu aworaki nan tin e tema aki, “Diaspora Arubano” andando cu ta un tiki mescla di e diferente culturanan di Aruba y tambe tin un poco di sclavitud. Mas cu claro ANA a agrega un pida acerca di Betico Croes unda ta conta di su historia hunto cu un variedad di potret.
Rodriguez a remarca cu e meta di actividad di Dia di Betico tabata pa ofrece un tour cu informacion. El agrega tambe cu si tin hende interesa den tour di e expo of den e parti di Betico Croes, scol of grupo di persona, por traha un afspraak pa ricibi un tour.
