Ayera pueblo di Aruba a despidi di Aruba su prome Prome Minister, Jan Hendrik “Henny” Albert Eman. Desde 10:30 di mainta ciudadanonan por a pasa na Plaza Henny Eman pa e ceremonia di entiero y duna condolencia na famia como tambe despedi di Sr. Henny Eman.
Un cantidad di dignatario di Aruba, Hulanda y Antias, como tambe un cantidad grandi di ciudadano, a asisti na e ceremonia di entiero na honor di Sr. Eman.
E corteho funebre a sali mainta for di Aurora Funeral Home direccion pa Cas di Partido AVP, caminda miembronan di e partido como tambe simpatisantenan tabatin e oportunidad di despedi di Sr. Eman.
Despues e proceso di despedida a continua y e corteho funebre a sali for di Cas di Partido AVP y a pasa dilanti Bestuurskantoor, y despues a ser instala na Plaza Henny Eman, pa asina duna inicio na e ceremonia di entiero oficial pa e ex-politico y lider di partido.
E ceremonia a tuma lugar for di 10:30 di mainta te cu 4or di atardi, durante cual comunidad a pasa pa despedi di Sr. Eman. Durante e ceremonia tambe lidernan di bario a pone krans, y despues di merdia diferente persona, entre otro Wendrick Cicilia y ex-prome minister y ruman di Sr. Henny Eman, Mike Eman, a hiba discurso na honor di e difunto.
Minister di Husticia Hulandes, David van Weel y ex-prome minister di Hulanda y actual minister di Estado Jan Peter Balkenende, ademas di ex-prome ministernan di Antias, Maria Libera Peters y Emily de Jong Elhage tambe tabata presente.
Despues cu termina cu e ceremonia di entiero, e corteho funebre a sali pa Santana Protestant caminda a dera e restonan mortal di e difunto.
Defunto Henny Eman a studia ley na Leiden, mescos su tata, y na inicio di añanan 70 el a bin Aruba pa pone partido AVP back riba pia y rescata e lucha. Henny hunto cu Alicio Quandt y Chibi Croes den un triumvirato a guia e partido na 1977 logrando 1 asiento.
Despues di eleccion, Henny a bay back Hulanda, caba su estudio cu Status Aparte como tema di su tesis y despues a bin back Aruba pa sigui den politica.
Na 1978, defunto Henny Eman a keda eligi como lider di AVP y Status Aparte a bin back como tema principal di partido AVP. E no a logra solamente pone su partido back riba pia, pero tambe su isla natal, na momento cu na 1986 el a keda eligi como e prome Prome Minister di pais Aruba, esaki despues di a convence Hulanda y Antias cu e anhelo di su pueblo, esta su derecho di autodeterminacion, ta algo sagrado. Asina Henny Eman a sirbi como Prome Minister di Aruba durante tres periodo.
