Ayera na Mariniers Kazerne Savaneta (MZK) a tuma luga e popular evento open dag, un evento organisa pa MZK conhuntamente cu e diferente organisacionnan di seguridad di Aruba. Despues di dos aña cu no por a organisa e evento pa motibo di e pandemia, pueblo di Aruba a acudi masalmente na e gran evento aki.
Manera ta custumber, ariba 1 di mei tin e tradicional evento di open dag na MZK na Savaneta, Un evento na unda pueblo di Aruba por drenta MZK y disfruta di un dia cu diferente actividad, benta di cuminda, articulo di cas, demostracion di parti di e organisacionnan di seguridad na Aruba y mucho mas.
Mester remarca cu pueblo di Aruba a acudi masalmente na e evento aki y for di prome cu e portanan a habri oficialmente, 10or di mainta, tabatin un rij largo di hende para pafo ta warda ansiosamente pa drenta y disfruta di nan dia. Un usuario di Facebook a publica un potret, cu a capta hopi atencion, na unda por a mira e rij di hende para ta warda pa drenta open dag.
Reportero di Bon Dia a combersa cu un di e bendedonan cu tabata presente na e evento bendiendo su productonan y el a conta cu e ta hopi contento cu despues di dos aña e por t’ey back pa e evento aki.
“Despues cu nos no por a haci nada door di e pandemia mi ta contento cu nos por a bin back e aña aki. Mi tin varios aña ta bin caba y mi ta gusta. Tin e oportunidad pa bende y ademas di esey pasa un rato agradabel, disfruta di e ambiente,” el a indica.
Vocero di Warda Costa, Shalick Clement, a conta cu e dia a bay hopi bon y cu tabatin hopi bishitante y hopi interes di parti di pueblo di Aruba pa disfruta di e dia. “Nos ta hopi contento. Despues di un par di aña cu en berdad nos no tabatin e open dag na Savaneta nos ta mira un gran interes,” el a bisa.
Clement a remarca cu e dia tabata hopi calor y pa motibo di esaki tabatin un par di hende cu a bira malo y mester a wordo atendi pa staff di entre otro Rode Kruis cu tambe tabata presente pa yuda den caso di emergencia. “Rode Kruis ta yudando nos hopi bon y nos tambe ta yudando caminda nos por. Pone awa riba nan cabes, riba nan pia pa yuda nan.”
Manera ta conoci, durante dia tabatin algun demostracion di parti di Warda Costa y Marina tambe. Warda Costa haci demostracion riba lama caminda nan metal shark a sali tras di un go fast pa haci un intercepcion. Duana tambe tabata presente y haci demostracion di con nan cachonan ta traha y con nan ta detecta droga.
Warda Costa tabatin su mesa di informacion tambe na unda hobennan por a pasa pa haci pregunta tocante e training di Warda Costa y alabes inscribi di biaha pa participa den e training aki.
“Nos a haya hopi mucha homber y mucha muhe, pues tin hopi interes,” Clement a indica.
Finalmente Clement a menciona cu mas cu claro na final di dia nan ta evalua con e dia a bay, con e evento a bay y asina wak ki aspectonan por mehora pa otro aña. “Nos ta bay evalua sigur con e dia a bay, pero te cu aworaki e ta bayendo bon, no tin niun incidente, apart di un par di hende cu a bira malo y tin hopi interes, pues nos ta hopi contento,” el a finalisa.
Reportero di Bon Dia a combersa tambe cu algun persona cu tabata disfrutando di e dia na MZK na Savaneta.
“Mi ta bin tur aña cu nan haci e evento, dimes mi mester a bin e aña aki atrobe despues cu nos no por a bin door di Covid. Mi ta contento cu nan a organisa e opendag, pero e calor ta hopi pisa. Solo ta hopi cayente. Mi kier sa mas cu tur otro aña, pero nos ta pasa bon toch,” un bishitante a indica.
Otro a bisa: “Mi gusta bin e opendag, pero tin hopi hende. Mi mester a warda casi un ora, si no ta mas, den rij pa subi boto y e solo ta hopi pica, hopi calor. Mester tene cuenta cu esey, pero ya despues cu nos no por a bin door di e pandemia, tabata di spera cu hopi hende lo bin tambe.”
