E simposio pa bon gobernacion a finalisa diahuebs ultimo cu un dialogo entre oradonan y publico riba topico di bon gobernacion y con pa crea un cultura di conscientisacion riba mesun topico. Pa e di tres anochi a enfoca riba e efectonan na nivel individual di integridad.

E enfoke di e simposio tabata pa elabora extensamente riba e topico di bon gobernacion y mal gobernacion, na diferente nivel cu esaki por manifesta su mes. Pa esaki e oradonan a enfoca cada un riba mal gobernacion sea na Aruba, den Reino, den Union Europeo y na nivel internacional.

Funcionamento di Trias Politica

Presidente di e Fundacion Gobernacion di Calidad Aruba, Armand Hessels a enfoca primeramente riba e varios rapportnan cu a wordo produci pa organonan di control den nos sistema democratico, manera CAft. Den e rapportnan aki ta wordo detaya con por yega na un administracion financiero sano di e sector publico na Aruba. Na mes momento e institucionnan ta duna conseho na gobierno riba esaki.

Sr. Hessels ta subraya cu e conseho aki no ta bindend. Esta cu e gobierno cu haya conseho di e institucionnan no mester bay di acuerdo cu esaki. “Esaki ta parti di e problema”, e ta bisa.

Adicionalmente sr. Hessels a mustra e publico presente un organogram di e funcionamento di sistema democratico riba nos isla. El a comenta cu nos polisa di gobierno ta wordo determina pa e partidonan politico, mientras cu podise nan no tin e experticio pa traha esaki, alabes ignorando e bon consehonan cu ta wordo poni riba mesa.

Sr. Hessels a sugeri den un di su presentacionnan pa independisa e organonan di control for di man di gobierno, pa asina logra haya un sistema cu ta mas eficiente. Pa ilustra esaki el a duna ehempel di servicionan di gobierno cu a wordo independisa y privatisa den pasado, manera Setar, WEB y Post.

Loke sr. Hessels ta argumenta durante su presentacionnan, ta cu e sistema cu nos ta uzando ta uno bunita y bon diseña riba papel, pero den practica e ta algo completamente otro.

Sr. Hessels ta recomenda encuanto e funcionamento di nos sistema democratico, pa nos purba experimenta cu diferente manera cu por representa e pueblo.

Esaki nos por wak caba na nivel internacional, tin experimentonan ta tumando luga. Na Merca, Hulanda, Irlanda por ehempel. Nos ta wak cu na nivel municipal personanan di diferente districto ta eligi representantenan y nan por haya poder di veto riba cualkier legislacion of accion cu pasa.

Dialogo cu publico

Durante e di tres anochi e oradonan a tene presentacionnan mas interactivo, unda por a dialoga cu e publico riba topiconan di corupcion. Loke a resalta di e simposio aki ta cu hopi informacion a wordo presenta, pero en fin e meta cu e fundacion a bin cu ne tabata pa tene un dialogo cu e publico y conscientisa nan pa pensa critico.

Pero loke mas a wordo subraya ta e rol di e comunidad mes den ta complice di mal gobernacion. Sr. Hessels: “Tin biaha nos ta cera wowo of nos ta complaciente den e actonan aki, pero mi ta spera cu despues di e anochi aki bin mas iniciativa di parti di personanan comun pa trece un cambio. Mi no ta kere e cambio lo bin for di seno politico.”

Puntonan pa considera pa eleccion

Nelly Schotborgh a toca e tema di puntonan pa considera pa eleccion venidero. Primeramente el a puntra si ora bo vota, bo ta consciente di e personanan/organisacionnan cu ta financia e partido politico cu bo tin pensa di vota pe. Ademas sra. Schorborgh a puntra si e interes di e personanan/organisacionnan aki ta conoci. Pa di dos, el a splica cu ora di vota pa un partido politico, mester considera si e partido tin reglanan of un codigo di conducta cu e miembronan di partido mester cumpli cu ne.

Pa di tres, el a nota cu ta importante pa pensa cuanto pechi un politico ta bisti. E tin side jobs? Negoshinan na banda di su trabou como politico?

Na final sra. Schotborgh a subraya cu ta importante pa considera si e partido politico en cuestion tin plannan pa cambia di mal gobernacion pa bon gobernacion.

Bildung

Un di e oradonan, Willeke Slingerland, a elabora riba e concepto Aleman di Bildung. Esaki ta un concepto cu ta envolve varios aspectonan den bida diario cu ta informa nos compas moral.

“Mi ta kere ta importante pa trece e topico di corupcion na un nivel mas personal. Hopi biaha nos ta critica politiconan y otro hende pero nos no ta critica nos mes. Pero mi ta kere e fenomeno di corupcion na nivel internacional ta cuminsa cu nos tur como individuo.”

Ryçond Santos do Nascimento, un profesor na Universidad di Aruba y experto riba leynan constitucional, ta di acuerdo cu e pensamento cu e manera pa bin cu cambio ta pa cuminsa na nivel individual.

“Loke mester tuma na serio ta cu e sistema ta supone cu cada ciudadano tin pensamento critico y por husga pa nan mes kico ta miho pa nan. Banda di esaki nos ta lubida cu nos derechonan democratico ta bay mas leu cu djis e derecho pa vota. Nos tin libertad di asociacion, prensa y libertad pa expresa nos mes. Nos mester un cultura unda nos por discuti topiconan y eherce nos derechonan politico. Mi ta spera cu asina nos por realisa nos propio poder.”

Pa cera e anochi, Glenn Thode, rector di Universidad di Aruba a wordo invita pa comparti su mensahe cu e publico. Sr. Thode a expresa cu e lo kier sigui cu e tipo di simposionan aki, ya cu e fundacion mes no tin pensa di organisa esaki pa algun tempo. Finalmente sr. Thode a expresa su pensamento pa medio di un citado di e presidente di Transparency International, cual ta un organisacion contra corupcion na nivel internacional. Cu corupcion, no tin desaroyo sostenibel, ta e mensahe di Jose Ugaz di Transparency International.

E ta referi na e Sustainable Development Goal(SDGs), un set di 17 reglamentonan delinea pa Nacionnan Uni. E reglamentonan aki ta metanan pa entre otro percura cu no tin hamber, pobresa, percura pa igualdad y pa combati global warming. Ta trata specificamente cu e SDG number 16: peace, justice and strong institutions.