Jeroen van Geesh kende ta trahado social di PAAZ a bisa cu dia 22 di october den cuadro di nan Mental Heath Awareness Day nan ta bay “haci un biahe” cu e bishitante.
El a describi loke lo tuma riba e dia ey como un orario di cuater bloki. Pa cada bloki e bishitante lo tin e posibilidad di atende cu dos di e oradonan invita.
Den total lo tin 8 oradonan invita y e bishitante mes por hinca su mesun programa den otro, ya cu cada rato e tin e chens pa atende entre e dos oradonan invita. E oradonan aki entre otro ta profesionalnan den e ramo di psikiatria mes, pero tambe tin algun di nan cu no ta traha den PAAZ, pero cu nan ta traha den comunidad.
Igualmente el a laga sa cu un bishitante no mester bin henter un dia, ya cu libremente e por scoge e bloki cu e respectivo oradonan cu e ta prefera di atende.
Blokinan
Nan ta cuminsa for di e momento cu ta wordo manifesta e señalnan cu ta mustra cu algo no ta bon cu bo mes, of bo famia of un persona conoci di bo. Tambe nan ta bay riba e parti di ayudo profesional y te hasta nan ta yega na e punto ora cu mester interna e persona na PAAZ mes.
Un parti importante cu nan lo bin cu ne ta esun di recuperacion. E ta importante pa realisa cu ora bo ta yega PAAZ bo no ta keda eynan pa keda pa semper, sino cu bo ta pasa den un proceso di recuperacion pa sali bek for di PAAZ pa sigui cu bo bida normal. “Pero pa yega e punto ey bo mester di guia”, el a bisa.
Sr. van Geesh hunto cu Sr. Clifton Ling di Jordan Ling Foundation a formula un invitacion pa henter comunidad por bay atende e evenemento aki cu ta totalmente gratis y cu lo tuma luga na Renaissance Convention Center.
