Recientemente a ser publica den medionan di comunicacion un articulo unda ta bisa cu e incinerator chikito ubica na Parkietenbos ta “state of the art”. E informacion treci dilanti ta desvia e atencion di e publico ariba e aspectonan negativo di e incinerator y ta basa ariba informacion cu no ta cuadra completamente cu e realidad.

Violacion di e ley di molester(Hinderverordening)
A ser menciona cu a cuminsa haci testnan di 8 ora pa dia. Esaki riba su mes ta cuestionabel debi cu ta trata di ful un dia di trabou sin cu tin un hindervergunning. Manera Bon Dia a publica anteriormente, DWJZ a indica cu pa por test mester permiso, y solamente den caso cu ta cende paga pa par di minuut por haci test sin esaki.

E ley di molester (Hinderverordening) ta menciona cu pa “crea” un instalacion ya caba un permiso ta necesario. E instalacion a wordo crea  sin permiso y hasta ta operando caba, pues contra ley. Den e peticion pa permiso pa crea molester ta indica cu ta trata di creacion, movemento y cambiamento di un instalacion cu por crea molester. De facto a haci e peticion pa crea/instala/cambia e instalacion cu por crea molester despues cu ya a haci esaki.

Desde cu e incinerator ta den operacion di testing di 8 ora pa dia e habitantenan tin hopi molester y hasta ta conoci cu trahadornan y habitantenan den e area a bira malo durante e testnan aki.

E procedura segun e ley di molester(Hinderverordening) ta hustamente pa duna un y tur e chens pa duna nan obhecion contra esaki, y pa asina por evalua e situacion prome cu crea e instalacion, cual no tabata e caso. Na momento cu a instala caba y es mas, cuminsa opera sin hindervergunning, ta actuando contra ley.

Instalacion di incinerator nunca ta completamente sin riesgo
Na otro paisnan caminda tin tecniconan specialisa cual ta monitor e incinerator constantemente pa evita accidente y eventual explosion ta wordo desconseha pa ubica esaki cerca di areanan habita. E hecho cu e Dump na Parkietenbos tin candelanan  continuo y permanente, confirma den rapport di Serlimar (Fire Rapport Serlimar 2020), ta forma extra riesgo pa explosionnan grandi of otro desgracianan. Manera tambe conoci pa hopi aña a keda yena e dump na Parkietenbos cu material radioactivo. Riba su mes un incinerator no tin garantia cu e lo opera sin causa explosion of otro desaster, y sigur menos riba un sero unda cu tin candela spontaneo.

Tin di remarca tambe cu e mesun caminda aki e trucknan di fuel ta pasa diariamente pa bay centro di aviacion. Mientras tin parti di e area cu no tin manera facil pa evacua habitantenan si en caso sosode un explosion, esaki por resulta na un calamidad.

Ta menciona entre otro cu e incinerator ta opera mesun sistema na Boneiro y Corsou
E incinerator por ta similar cu esun di Boneiro of Corsou pero e condicionnan di contorno ta totalmente otro. Na Boneiro por ehempel e incinerator di Selibon ta ubica leu di area habita. Mientras cu por a compronde cu na Corsou desperdicio medico ta wordo kima na incinerator di hospital mes pa preveni infeccion y contaminacion y sludge ta wordo procesa di un manera mas eficiente na unda e awa ta wordo uza pa irigacion.

No tin ningun garantia cu e incinerator lo trece alivio pa Parkietenbos
Desde varios aña ta conoci cu e dump di Parkietenbos a yega su capacidad maximo y cu mester wordo cera. Na aña 2018 PAHO den su rapport a duna orden na gobierno di Aruba pa cera e dump di Parkietenbos inmediatamente pa motibo cu e dump ta malo pa salud di e habitantenan di Parkietenbos. Instalacion y operacion di un incinerator ariba dump di Parkietenbos lo stroba e proceso di sanea y cera e dump debi cu desperdicionan medico,bestia morto y sludge lo keda wordo hiba na e dump y despues di procesamento e area lo keda wordo contamina cu emisionnan toxico y shinishinan (ash) di e incinerator mientras e candelanan spontaneo lo continua. Segun plan di desaroyo special ROP 2019 e area lo mester haya un otro destinacion, pues di recreacion.

PAHO ta menciona tambe den su rapport cu e ubicacion di e dump Parkietenbos ta contra protocolnan internacional di aviacion di International Civil Aviation Organization ICAO, cual ta un agencia specialisa di Nacionnan Uni.

Considerando e aspectonan tecnico y capacidad di e incinerator, ta asina cu ni si e incinerator opera 8 ora pa dia e no lo ta suficiente pa procesa tur e sludge. Tambe manera menciona kier procesa desperdicio medico den e incinerator. Esaki por contene material toxico, radioactivo y contamina. Mundialmente e tratamento di desperdicio medico ta wordo procesa na e lugar cu e desperdicio ta origina (Treatment at the source) pa evita cualkier contaminacion of infeccion. Pa es motibo aki hospitalnan tin nan propio incinerator cu ta wordo uza solamente pa desperdicio medico.

Emisionnan toxico
Den e articulo ta menciona lime powder pa filters pa yuda purifica. E polvo aki ta hopi iritante pa cuero, slijmvlies, wowo, boca y pulmon.

Fuera di esey a menciona cu e gas lo sali sin holor. Ta conoci cu hustamente e gasnan sin holor ta locual ta mas toxico y dañino pa e salud. E concentracion di e emissionan ta depende di diferente factornan incluyendo tipo di desperdicio, humedad, volumen di desperdicio, fuel cu ta wordo uza y condicionnan ambiental. No tin garantia riba e cantidad di emisionan cu habitantenan/trahadornan lo wordo expone na dje y te na unda esaki lo ta safe.

Aruba no tin ley di medio ambiente y tampoco ley di calidad di aire. Tampoco no tin meetstations permanente manera Hulanda ta uza pa midi e aire. Un sistema di control di polucion no ta suficiente pa garantisa cu e habitantenan cu wordo exponi na e polucion lo no sufri pa esaki. Otro factor ta e direccion di e biento y e altitud di e barionan cual ta keda mas abao cu e incinerator, pues esaki lo causa cu e emisionan lo sak y permanece den e area habita.

Incinerator ta contra e obhetivonan di desaroyo duradero di United Nations (SDG’S), mientras cu tin otro opcionnan sostenibel y no dañino pa salud y medio ambiente.

Sinembargo tin otro sitionan na Aruba cu ta leu di area habita y leu di area proteha cu por wordo destina pa incineracion, manera por ehempel na RDA unda cu tin un incinerator caba ta operando.

Mester menciona cu un y tur tin e oportunidad pa entrega un obhecion contra e incinerator prome cu dia 20 di augustus na Minister di Husticia,Siguridad y Integracion mediante Directie Wetgeving en Juridische Zaken (DWJZ).

Nota di redaccion: Mester menciona alabes cu henter e proceso di destaho pa e incinerator chikito cumpra pa DOW, manera Bon Dia a yega di publica caba, tabata padece di transparencia. Parlamentario di VVD André Bosman a skirbi tocante esaki. Ultimo simannan e matutino aki a tuma contacto cu DTI pa asina compronde e aspecto di siguridad cu mas profundidad pero e departamento no a duna oido na e peticion aki, maske a tuma contacto y email varios biaha. Ainda no tin claridad riba kico ta DTI su rol den normanan di siguridad pa e incinerator y si ta envolve nan mes. Awe hues lo bay tira bista na e sitio di e dump den cuadro di un ciudadano su caso contra pais Aruba pa entre otro operacion di e incinerator na dump. Ciudadanonan a tuma nota ayera cu a haci limpi na e dump, rond di unda ta instala e incinerator, hustamente un dia prome cu hues su bishita.