Ayera tardi ariba Facebook por a tuma nota di un post di un usuario cu a hala atencion di hopi hende. Ta trata di un caso di dos ruman menor di edad, cinco y dos aña di edad, cu ta wordo neglisha pa nan mayor y cu ta wordo cuida pa nan wela cu ta hopi malo di salud.

E usuario Mercedes Lampe Ev Soliana a publica ariba su cuenta di Facebook e relato unda e ta conta e situacion lamentabel cu e menornan di edad di edad ta aden cu speransa cu por tin algun persona cu lo por brinda ayudo na e muchanan.

Lampe Ev Soliana a expresa su descontento cu e sistema di hudicial na Aruba. “Mi no tbt kier a trece e cos ki riba Facebook pero mi ta hopi rabia mes cu e sistema di husticia na Aruba,” el a expresa.

Den su publicacion el a splica cu for di aña 2018 el a entrega un keho oficial na Bureau Sostenemi y na aña 2022 y 2023 el a bolbe entrega un keho pa loke ta e situacion cu e dos rumannan ta pasando aden.

E usuario ta indica cu e muchanan ta ser laga un banda pa nan mama, y e tata di e criaturanan no ta conoci. El a sigui conta cu e mama no ta wak pa su yiunan y ta laga nan atras cerca nan wela di 72 aña di edad cu ta hopi malo di salud.

“E wela ta haci su best pa wak pa nan y e ta hopi malo di salud. E wela tin diabetes el a yega di haya hersenbloeding y a opera cabes, e wela tin problema di rudia cu di baina por cana e wela tin leak na curason,” el a remarca.

El a indica tambe cu e wela ta cobra pensioen so y e muchanan no tin nada pa bay scol. E mama ta cobra onderstand y no ta duna nada pa yuda cu e necesidadnan di e mucha nan. “E pober wela ta pone e baby di 2 aña mara den un stroller henter e dia paso echt e wela no por otro. Su salud no ta duna pa e sigui wak pe muchanan,” el a agrega.

Ademas di esaki, segun e usuario a sigui splica, e mama a sali for di cas bay cu un delincuente cu ta drenta y Sali for di KIA y niun di dos ta wak pa e muchanan.

Pa e motibonan aki el a entrega un keho na aña 2018 y e mesun aña ey, el a splica, Bureau Sostenemi a inform’e cu e no tin prueba di loke e ta bisa cu ta pasando.

Aworaki den 2023 el a acerca Fontein Kleuterschool y el a papia cu e sociale werkster di scol cu, segun el a indica, tambe a entrega un keho y un rapport na Bureau Sostenemi tocante e caso di e muchanan.

Lampe Ev Soliana a remarca cu el a acerca cinco testigo cu ta bishita e cas unda e muchanan ta biba y el a duna informacion y number di contacto di e testigonan for di juni 2023, pero te dia di awe ningun di e testigonan a wordo acerca pa Bureau Sostenemi. El a indica tambe cu el a entrega video y potret di loke ta pasa den e caso di e dos muchanan y cu e no por pidi afspraak cu minister pasobra “ta tempo perdi.”

El a agrega tambe cu e mama di e muchanan ta menasa e wela cu e ta mata e muchanan y mata su mes. Ademas e ta usa droga y Warda di Polis na San Nicolas tin varios melding ora tin problema na e cas unda e muchanan ta biba.

“Mi nunca a worry pa keda anonimo den e caso aki e famia sa cu mi a meld nan for aña 2018 y nan sa tambe cu husticia no ta bay haci nan nada. Cu e post aki mi kier pa e yega na esun cu si por haci algo pa e muchanan aki. Esnan cu conoce mi historia ami kier tuma e dos muchanan aki, pero ya mi ta sinti mi cu mi mesun yiunan ta grandi caba cu mi no kier tuma mas mucha pero loke mi ta wak e muchanan aki ta pasa aden ta kibra mi curason. Y mirando cu mi ta dos luna den exterior cu vakantie mi no tin bista di e muchanan pa mi yuda nan cu loke mi por y Bureau Sostenemi no ta haci nada,” el a enfatisa.

E publicacion a wordo comparti pa diferente persona y a haya reaccion di diferente usuario tambe cu ta demostra nan preocupacion y frustracion cu e instancianan concerni no ta yuda e muchanan den e situacion lamentabel aki.

“Ban wak cuanto tempo mas e lo dura. Ainda nan ta lubida e caso di e dos muchanan cu a wordo asesina cu ningun instancia a yuda y aworaki atrobe un caso asina a yega. Tempo pasa cuminsa ruim op de boel den poco instancia y pone hende cu ta traha pa yuda den e casonan aki,” un usuario a comenta ariba e publicacion.

“Unda nos ministernan ta? Unda e hendenan cu ta traha den e instancianan aki ta? Ken por yuda awor e dos muchanan? Ken por yuda e señora di edad?,” otro usuario a puntra.

“Pa mi bisa bo berdad loke ta Sostenemi y Voogdijraad no ta sirbi pa nada. Ni cu prueba nan ta haci nada toch,” otro usuario a señala.

No ta prome biaha cu algun persona ta acudi na e metodo di medionan social pa vocifera of informa comunidad di situacionnan lamentabel asina cu no ta ricibi e atencion ni ayudo necesario. Un problema cu aparentemente no ta cambia y ta keda afecta e bida di muchanan inocente.

Si tin algun persona cu por yuda den e caso di e muchanan aki, por tuma contacto cu e Sra. Mercedes Lampe Ev Soliana na 5924860 pa brinda e apoyo y yuda necesario den e caso aki.